Masallı rayonunda 28 May – Müstəqillik Günü münasibətilə və Masallı Dövlət Regional Kollecinin “Gurşad” jurnalının təqdimatına həsr olunmuş “Müstəqilliyin təntənəsi” mövzusunda konfrans keçirilib.

Tədbir Yeni Azərbaycan Partiyası Masallı rayon təşkilatı, Masallı Dövlət Regional Kolleci, Türk Ağsaqqalları Arasında Əlaqələrin İnkişafı İctimai Birliyi və Yeni Azərbaycan Partiyası Lənkəran şəhər təşkilatı tərəfindən, Heydər Əliyev Mərkəzinin tərəfdaşlığı ilə təşkil olunub.

Konfrans iştirakçıları əvvəlcə Heydər Əliyevin abidəsini ziyarət edərək önünə gül dəstələri düzüb, dahi şəxsiyyətin xatirəsini ehtiramla yad ediblər. Daha sonra Ulu Öndərin və Azərbaycanın ərazi bütövlüyü uğrunda canlarından keçmiş şəhidlərin əziz xatirəsi bir dəqiqəlik sükutla anılıb, Azərbaycan Respublikasının Dövlət Himni səsləndirilib.

Konfransda çıxış edən Masallı Dövlət Regional Kollecinin direktoru Rövşən Qurbanov, Türk Ağsaqqalları Arasında Əlaqələrin İnkişafı İctimai Birliyinin sədri Sudeif İmamverdiyev, Yeni Azərbaycan Partiyası Masallı rayon təşkilatının sədri Seyfəddin Əliyev, yazıçı-publisist Mübariz Süleymanlı və “Gurşad” jurnalının baş redaktoru Zakir Abbas 28 Mayın Azərbaycan xalqının tarixində mühüm yer tutduğunu vurğulayaraq, 1918-ci ildə yaradılmış Azərbaycan Xalq Cümhuriyyətinin yaradılmasının Şərqdə ilk demokratik parlamentli respublika kimi tarixə düşdüyünü bildiriblər.

Çıxışlarda həmçinin qeyd olunub ki, “Gurşad” jurnalı tələbələrin yaradıcılıq imkanlarının üzə çıxarılmasına, onların elmi, ədəbi və ictimai fəaliyyətlərinin geniş auditoriyaya çatdırılmasına xidmət edən mühüm nəşrdir. Jurnalın gənclərdə mütaliə, araşdırma və yaradıcılıq vərdişlərinin formalaşmasına əhəmiyyətli töhfə verdiyi diqqətə çatdırılıb.

Tədbir çərçivəsində Masallı Dövlət Regional Kollecinin müəllim və tələbələrinin hazırladığı ədəbi-bədii kompozisiya nümayiş etdirilib.

Sonda rayonun ictimai-siyasi həyatında və konfransın işində fəal iştirak edən bir qrup şəxs fəxri fərman və xatirə hədiyyələri ilə təltif olunub.