Masallıda Ümummilli Lider Heydər Əliyevin anadan olmasının 103-cü ildönümünə həsr edilmiş idarə, müəssisə və təşkilatların komandaları arasında keçirilən minifutbol turnirinə yekun vurulub.

Tədbirdə əvvəlcə Ümummilli Lider Heydər Əliyevin və Azərbaycanın ərazi bütövlüyü uğrunda canlarını fəda etmiş şəhidlərin əziz xatirəsi bir dəqiqəlik sükutla yad olunub.

Mayın 8-də Ərkivan Arena minifutbol meydançasında keçirilən final oyunları və mükafatlandırma mərasimi böyük maraqla qarşılanıb. Turnir Masallı Rayon İcra Hakimiyyəti, Lənkəran-Astara Regional Gənclər və İdman İdarəsi və YAP Masallı rayon təşkilatının birgə təşkilatçılığı ilə həyata keçirilib.

Aprelin 20-dən start götürən yarışda rayonun müxtəlif idarə və təşkilatlarını təmsil edən 8 komanda qüvvəsini sınayıb. Turnir boyunca komandalar yüksək əzmkarlıq nümayiş etdirərək azarkeşlərə maraqlı və gərgin oyunlar təqdim ediblər.

Yekun nəticələrə əsasən, Masallı Rayon Uşaq-Gənclər İdman Şahmat Məktəbinin komandası bütün rəqiblərini məğlub edərək turnirin qalibi adına layiq görülüb. Masallı Rayon İcra Hakimiyyətinin komandası ikinci, Masallı Rayon Mərkəzi Xəstəxanasının komandası isə üçüncü yeri tutub.

Mükafatlandırma mərasimində çıxış edənlər Heydər Əliyevin ölkəmizdə idmanın inkişafına göstərdiyi diqqət və qayğıdan danışaraq, bu cür yarışların gənclər arasında sağlam həyat tərzinin təbliği və vətənpərvərlik ruhunun gücləndirilməsi baxımından mühüm əhəmiyyət daşıdığını vurğulayıblar.