01 oktyabr 2026-cı il tarixdə Masallı Rayon İcra Hakimiyyətinin başçısı Araz Əhmədovun rəhbərliyi ilə dövlət qurumlarında vətəndaşlara göstərilən xidmətlərin keyfiyyətinin yüksəldilməsi, dövlət qurumlarının müsbət imicinin möhkəmləndirilməsi və dövlət qulluqçularının etik davranış qaydalarına riayət etməsi məsələlərinə həsr olunmuş “Vətəndaş müraciətlərinə həssas yanaşma” mövzusunda tədbir keçirilib.

Tədbirdə Masallı Rayon İcra Hakimiyyətinin kollektivi, rayon ərazisində fəaliyyət göstərən idarə, müəssisə və təşkilatların, hüquq-mühafizə orqanlarının rəhbərləri, inzibati ərazi dairələri üzrə nümayəndələr və bələdiyyə sədrləri iştirak ediblər.

Tədbirdə çıxış edən Masallı Rayon İcra Hakimiyyətinin başçısı Araz Əhmədov dövlət idarəçiliyində vətəndaş məmnunluğunun təmin edilməsinin əsas prioritetlərdən biri olduğunu bildirib. Qeyd olunub ki, vətəndaşların müraciətlərinə diqqətlə və həssaslıqla yanaşılması, onların qaldırdıqları məsələlərin qanunvericiliyin tələblərinə uyğun şəkildə araşdırılması və həlli istiqamətində zəruri tədbirlərin görülməsi dövlət-vətəndaş münasibətlərinin möhkəmləndirilməsində mühüm əhəmiyyət daşıyır.

Bildirilib ki, hər bir dövlət qulluqçusunun fəaliyyəti dövlət idarəçiliyinin cəmiyyət tərəfindən qiymətləndirilməsinə təsir göstərir. Bu baxımdan vətəndaşlarla ünsiyyət zamanı nəzakətli, diqqətli, obyektiv və məsuliyyətli davranılması, onların hüquq və qanuni mənafelərinə hörmətlə yanaşılması, müraciətlərə qanunvericiliyin tələblərinə uyğun münasibət göstərilməsi vacib şərtlərdəndir.

Tədbirdə dövlət qurumlarının fəaliyyətində şəffaflığın və məsuliyyətin artırılması, göstərilən xidmətlərin vətəndaşların tələblərinə uyğun təşkil edilməsi, müraciətlərə operativ baxılması və nəticələr barədə vətəndaşların vaxtında məlumatlandırılması məsələləri ətrafında geniş fikir mübadiləsi aparılıb.

Çıxışlarda dövlət qulluqçularının xidməti fəaliyyət zamanı qanunçuluq, obyektivlik, qərəzsizlik, nəzakətlilik, məsuliyyətlilik və şəffaflıq prinsiplərini rəhbər tutmalarının vacibliyi vurğulanıb. Həmçinin vətəndaşların müraciətlərinə bərabər və ədalətli münasibət göstərilməsi, ayrı-seçkiliyə yol verilməməsi və hər bir müraciətin fərdi qaydada araşdırılmasının əhəmiyyəti diqqətə çatdırılıb.

Tədbirdə vətəndaş müraciətlərinin qəbulu və dinlənilməsi, müraciətlərdə qaldırılan məsələlərin aidiyyəti üzrə araşdırılması, onların həlli istiqamətində qanunvericiliyin imkanlarından səmərəli istifadə olunması və görülən tədbirlərin nəticəsi barədə vətəndaşların məlumatlandırılması ilə bağlı məsələlər də müzakirə edilib.

Qeyd olunub ki, vətəndaş müraciətlərinin hər biri konkret insanın problem və gözləntilərini əks etdirir. Bu səbəbdən müraciətlərə formal yanaşmaya yol verilməməli, onların mahiyyəti diqqətlə öyrənilməli və qanunvericiliyin tələblərinə uyğun həlli üçün zəruri tədbirlər görülməlidir.

Eyni zamanda, dövlət qurumlarının əməkdaşlarının davranış mədəniyyətinin və peşəkarlığının dövlət orqanlarının ictimai nüfuzunun formalaşmasında mühüm rol oynadığı bildirilib. Əməkdaşların xidməti intizama və müəyyən edilmiş etik davranış qaydalarına ciddi əməl etmələri, həm iş prosesində, həm də ictimai mühitdə yüksək davranış mədəniyyəti nümayiş etdirmələri vacib vəzifələr kimi diqqətə çatdırılıb.

Tədbirdə yerli icra hakimiyyəti orqanları, inzibati ərazi dairələri üzrə nümayəndəliklər və bələdiyyələr arasında qarşılıqlı əməkdaşlığın daha da gücləndirilməsi, vətəndaşların qarşılaşdıqları məsələlərin aidiyyəti üzrə çevik və əlaqəli şəkildə araşdırılması məsələləri də müzakirə olunub.

Daha sonra mövzu ətrafında fikir mübadiləsi aparılıb, iştirakçıların təklifləri dinlənilib və qarşıda duran vəzifələr müəyyənləşdirilib.

Tədbirin sonunda vətəndaş məmnunluğunun təmin edilməsi, dövlət xidmətlərinin keyfiyyətinin yüksəldilməsi, vətəndaş müraciətlərinə həssas və məsuliyyətli yanaşılması, etik davranış qaydalarına ciddi əməl olunması və dövlət qurumlarının fəaliyyətində şəffaflığın daha da artırılması istiqamətində tədbirlərin ardıcıl şəkildə davam etdirilməsinin vacibliyi vurğulanıb.