Biləsuvar Rayon İcra Hakimiyyətinin və Biləsuvar Rayon Mərkəzi Xəstəxanasının təşkilatçılığı ilə akademik Zərifə xanım Əliyevanın anadan olmasının 103-cü ildönümü ilə bağlı tədbir keçirilmişdir.

Tədbirdə Biləsuvar Rayon İcra Hakimiyyəti başçısının müavini, Ərazi-təşkilat və ictimai-siyasi məsələlər şöbəsinin müdiri Ləman Yüzbaşıyeva, Biləsuvar Rayon Mərkəzi Xəstəxanasının direktoru Asəf Məmmədov, həkim ginekoloq-mama Sevil xanım Abdullayeva, həkim anestezioloq Mürsəliyev Mirnəsiyət çıxış etmişlər.

“Nur Paylayan Ömür Yolu”

Azərbaycanın tibb elmi tarixində silinməz izlər qoymuş, görkəmli oftalmoloq-alim, akademik Zərifə xanım Əliyevanın anadan olmasının 103-cü ildönümü təkcə tibbi ictimaiyyət üçün deyil, bütövlükdə xalqımız üçün böyük mənəvi əhəmiyyət kəsb edən bir gündür. O, yalnız peşəkar həkim deyil, eyni zamanda humanizm prinsiplərini fəaliyyətinin əsasına çevirən böyük şəxsiyyət olmuşdur.

Zərifə xanım Əliyevanın zəngin elmi irsi bu gün də aktuallığını qoruyur. Onun fəaliyyətinin əsas istiqamətlərindən biri traxoma ilə mübarizə olmuşdur.

O, dünyada ilk dəfə peşə patologiyasını araşdıran elmi-tədqiqat laboratoriyası yaratmış, kimya sənayesində çalışan insanların görmə qabiliyyətinin qorunması üçün effektiv metodlar hazırlamışdır.

Akademik Zərifə Əliyeva həkimlik peşəsinin etik kodeksini öz həyat tərzi ilə formalaşdırmışdır. O qeyd edirdi ki:
"Həkimin xəstəyə münasibəti onun sağalmasına elmi biliklər qədər təsir edir."

Onun xəstələrinə göstərdiyi ana qayğısı və diqqəti bu gün hər bir tibb işçisi üçün nümunədir.

Ömür-gün yoldaşı

Zərifə xanım eyni zamanda müasir Azərbaycanın qurucusu Heydər Əliyevin vəfalı ömür-gün yoldaşı, mənəvi dayağı olmuşdur. O, həm nümunəvi ana, həm də dövlət rəhbərinin ən yaxın məsləhətçilərindən biri kimi tarixə düşmüşdür.