30 aprel 2026-cı il tarixində Masallı rayonunda Ümummilli Lider Heydər Əliyevin anadan olmasının 103-cü ildönümünə həsr olunmuş növbəti tədbir keçirilib.

Masallı Kitab Festivalı çərçivəsində psixoloq, təlimçi, “Emosional İntellekt” kitabının müəllifi, “İntegro Center” Psixologiya Mərkəzinin təsisçisi, Amerika Psixoloqlar Assosiasiyasının üzvü Röyalə Vüqarqızının kitab sərgisi də iştirakçıların diqqət mərkəzində olub.

Masallı Rayon İcra Hakimiyyətinin başçısı Araz Əhmədov, Milli Məclisin deputatı Məşhur Məmmədov, hüquq-mühafizə orqanlarının rəhbərləri, ictimaiyyət nümayəndələri və rayon sakinləri sərgi zamanı Röyalə Vüqarqızının kitab guşəsinə baxış keçiriblər.

Sərgi zamanı müəllif qonaqlara “Emosional İntellekt” kitabı haqqında ətraflı məlumat verib, əsərin əsas ideyaları, psixoloji inkişafda kitabın rolu və müasir dövrdə emosional zəkanın əhəmiyyəti barədə fikirlərini bölüşüb.

Röyalə Vüqarqızı çıxışında bildirib ki, müasir dövrdə insanın emosional inkişafı, psixoloji dayanıqlılığı və sağlam düşüncə tərzinin formalaşması üçün kitabın rolu olduqca böyükdür. O qeyd edib ki, xüsusilə gənclər arasında mütaliə vərdişinin artırılması, onların həm intellektual, həm də mənəvi inkişafına mühüm töhfə verir.

Ümummilli Lider Heydər Əliyevin anadan olmasının 103-cü ildönümü münasibətilə rayonda silsilə tədbirlərin davam etdiyi bildirilib.