Masallı Kitab Festivalının üçüncü günü: yazıçı və deputatla oxucu görüşü
02 may 2026-cı il tarixində Masallı şəhərində, İcra Hakimiyyətinin qarşısında Ümummilli Lider Heydər Əliyevin anadan olmasının 103-cü ildönümünə həsr olunmuş “Masallı Kitab Festivalı – 2026” çərçivəsində festivalın üçüncü günü maraqlı və zəngin proqramla davam edib.
Tədbirdə Milli Məclisin deputatı, Əməkdar jurnalist Elçin Mirzəbəyli və tanınmış şair-yazıçı Əkbər Qoşalı iştirak ediblər.
Festival çərçivəsində Əkbər Qoşalının imza saatı təşkil olunub. Oxucular müəlliflə yaxından görüşərək onun yaradıcılığı ilə bağlı fikir mübadiləsi aparıb, kitablarını imzalatmaq imkanı əldə ediblər. Eyni zamanda Elçin Mirzəbəyli də tədbirdə iştirak edərək oxucular, ziyalılar və gənclərlə görüş keçirib.
Görüş zamanı kitabın cəmiyyətin inkişafında, xüsusilə gənc nəslin maariflənməsi və vətənpərvər ruhda formalaşmasında mühüm rol oynadığı vurğulanıb. Qeyd olunub ki, bölgələrdə keçirilən belə festivallar oxucularla müəlliflər arasında canlı ünsiyyətin yaranmasına, mütaliə mədəniyyətinin inkişafına və kitab sevgisinin daha da artmasına töhvə verir.
