Aprelin 30-da Azərbaycan Respublikasının Prezidenti İlham Əliyev Albaniyanın paytaxtı Tiranada keçirilmiş güləş üzrə Avropa çempionatında komanda hesabında birinci yeri qazanan milli komandamızın üzvlərini – sərbəst, yunan-Roma və qadın güləşi üzrə medalçılarımızı və onların məşqçilərini qəbul edib.

Görüş zamanı çıxış edən Prezident İlham Əliyev Azərbaycan güləşçilərinin qazandığı böyük qələbəni yüksək qiymətləndirib və bildirib ki, bu nəticə xalqımız üçün böyük qürur mənbəyidir. Dövlət başçısı qeyd edib ki, Avropa çempionatında komanda hesabında birinci yerə yüksəlmək ciddi rəqabət şəraitində əldə olunan mühüm nailiyyətdir.

Çıxışı zamanı Prezident İlham Əliyev vurğulayıb ki, hazırda həm Avropada, həm də dünyada güləş üzrə mübarizə çox yüksək səviyyədə gedir və Azərbaycan idmançıları bu yarışlarda öz peşəkarlıq və iradələri ilə fərqlənərək uğur qazanıblar.

Dövlət başçısı bildirib ki, Azərbaycan güləşi zəngin ənənələrə malikdir və bu ənənələr bu gün də uğurla davam etdirilir. Tanınmış idmançılarla yanaşı, gənc güləşçilərin də beynəlxalq yarışlarda əldə etdiyi nəticələr idman sahəsində düzgün hazırlıq sisteminin formalaşdığını göstərir.

Prezident İlham Əliyev çıxışında qeyd edib ki, beynəlxalq yarışlarda Azərbaycan bayrağının dalğalanması xalqımızda böyük qürur hissi yaradır və bu qələbələr gənc nəslin vətənpərvərlik ruhunda tərbiyəsində mühüm rol oynayır.

Sonda dövlət başçısı idmançıları bir daha təbrik edərək onlara gələcək yarışlarda yeni uğurlar arzulayıb.

İlkin Quliyev YAP Masallı rayon təşkilatının əməkdaşı