Masallı Dövlət Regional Kollecində yanğın təhlükəsizliyi ilə bağlı maarifləndirici tədbir keçirildi.

Bakuinfo xəbər verir ki, Fövqəladə Hallar Nazirliyinin Dövlət Yanğın Mühafizə Xidmətinin Masallı rayon Dövlət Yanğından Mühafizə Hissəsinin əməkdaşları, eləcə də Dövlət Yanğın Nəzarəti Xidmətinin Cənub Regional Dövlət Yanğın Nəzarəti İdarəsinin Dövlət Yanğın Nəzarəti şöbəsinin əməkdaşlarının iştirakı ilə kollecdə şərti yanğın təlimi təşkil olunmuşdur.

Təlim zamanı fövqəladə hallar zamanı düzgün davranış qaydaları, ilkin yanğınsöndürmə vasitələrindən istifadə və operativ təxliyə prosesləri praktik olaraq nümayiş etdirilmişdir. Eyni zamanda, inspektor, daxili xidmət leytenantı Əliyev Vüsal Ələsgər oğlu tərəfindən tələbələrə yanğın təhlükəsi və ondan qorunma yolları ətraflı izah olunmuşdur. Həmçinin, kollecin Mülki müdafiə qərargahının rəisi Əsədli Əsəd Tofiq oğlu tərəfindən təlimatda fəal iştirak təmin olunmuşdur.

Tədbirin əsas məqsədi tələbə və əməkdaşların yanğın təhlükəsizliyi sahəsində bilik və bacarıqlarının artırılması, həmçinin mümkün fövqəladə vəziyyətlərə hazırlıq səviyyəsinin yüksəldilməsi olmuşdur.

Keçirilən təlim iştirakçılar tərəfindən maraqla qarşılanmış və yüksək təşkilatçılıq şəraitində baş tutmuşdur.