02 oktyabr 2026-cı il tarixində Masallı Rayon İcra Hakimiyyətinin başçısı Araz Əhmədovun Ərkivan qəsəbə sakinləri ilə növbəti səyyar görüş-qəbulu keçirilib.

Səyyar qəbulda Masallı Rayon İcra Hakimiyyətinin başçısı Araz Əhmədov, RİH başçısı aparatının məsul əməkdaşları, aidiyyəti idarə və müəssisələrin nümayəndələri, eləcə də Ərkivan qəsəbə sakinləri iştirak ediblər.

Görüşü giriş sözü ilə açan rayon rəhbəri Ərkivan qəsəbəsinin tarixi, tanınmış ziyalıları və ağsaqqalları, mədəni irsi, əhalinin məşğuliyyəti, habelə sosial-iqtisadi inkişafı barədə məlumat verib. Bildirilib ki, vətəndaş müraciətlərinin yerində dinlənilməsi və onların həlli istiqamətində operativ tədbirlərin görülməsi dövlət-vətəndaş münasibətlərinin daha da möhkəmləndirilməsinə xidmət edir.

Daha sonra çıxış edən Masallı Rayon İcra Hakimiyyəti başçısı aparatının Sənəd dövriyyəsi, vətəndaş müraciətləri və inzibati işlər şöbəsinin müdiri Famil Cəfərov Ərkivan qəsəbəsində əvvəlki səyyar qəbul zamanı vətəndaşlar tərəfindən qaldırılmış məsələlərin icra vəziyyəti barədə məlumat verib. Bildirib ki, əvvəlki qəbul zamanı 4 vətəndaş tərəfindən 4 məsələ qaldırılıb. Onlardan 2-si müsbət həll edilib, digər 2 məsələ ilə bağlı isə vətəndaşlara qanunvericiliyin tələblərinə uyğun müvafiq izahat verilib.

Səyyar qəbul zamanı qəsəbə sakinlərinin müraciətləri dinlənilib. Müraciətlər əsasən sosial və şəxsi xarakterli məsələlərlə bağlı olub. Rayon rəhbəri tərəfindən hər bir müraciət diqqətlə dinlənilib, qaldırılan məsələlərin araşdırılması və həlli ilə bağlı aidiyyəti məsul şəxslərə müvafiq tapşırıqlar verilib.

Araz Əhmədov çıxışında bildirib ki, yaşayış məntəqələrində əhalini narahat edən sosial problemlərin həlli daim diqqət mərkəzində saxlanılır. Bu istiqamətdə həyata keçirilən tədbirlər bundan sonra da mərhələli şəkildə davam etdiriləcək. Rayon rəhbəri sakinləri qarşılaşdıqları məsələlərlə bağlı fəal şəkildə müraciət etməyə çağırıb və hər bir müraciətin qanunvericiliyin tələblərinə uyğun şəkildə araşdırılacağını vurğulayıb.