20 may 2026-cı il tarixdə Masallı Rayon İcra Hakimiyyətinin başçısı Araz Əhmədov rayonun Qodman ərazisində sakinlərlə növbəti səyyar görüş-qəbul keçirmişdir.

Səyyar qəbulda rayon rəhbəri çıxış edərək Qodman ərazisinin tarixi, ziyalıları, ağsaqqalları, mədəniyyəti, əhalinin məşğuliyyəti və sosial-iqtisadi inkişafı barədə ətraflı məlumat vermişdir. Araz Əhmədov qeyd etmişdir ki, vətəndaş müraciətlərinin yerində dinlənilməsi, mövcud problemlərin operativ araşdırılması və həlli dövlət-vətəndaş münasibətlərinin daha da möhkəmləndirilməsində mühüm əhəmiyyət daşıyır.

Görüş zamanı Masallı Rayon İcra Hakimiyyətinin Sənəd dövriyyəsi, vətəndaş müraciətləri və inzibati işlər şöbəsinin müdiri Famil Cəfərov çıxış edərək bildirmişdir ki, ərazidə keçirilən əvvəlki səyyar qəbul zamanı 2 vətəndaş tərəfindən 3 məsələ qaldırılmış, həmin müraciətlərdən 2-si müsbət həll olunmuş, 1 məsələ ilə bağlı isə aidiyyəti üzrə işlərə başlanılmışdır.

Qəbul zamanı sakinlər tərəfindən əsasən sosial və şəxsi xarakterli müraciətlər səsləndirilmiş, qaldırılan məsələlər rayon rəhbərinin tapşırığı əsasında aidiyyəti məsul şəxslər tərəfindən qeydə alınaraq müvafiq qurumlara icrası üçün tapşırıqlar verilmişdir.

Rayon rəhbəri çıxışında yaşayış məntəqələrində mövcud sosial problemlərin həllinin daim diqqət mərkəzində saxlanıldığını, bu istiqamətdə tədbirlərin mərhələli şəkildə davam etdiriləcəyini vurğulamışdır. O, sakinləri fəal olmağa çağıraraq hər bir müraciətin diqqətlə araşdırılacağını və səlahiyyətlər çərçivəsində həll ediləcəyini bildirmişdir.

Səyyar görüş kənd sakinləri tərəfindən razılıqla qarşılanmış, vətəndaşlar onlara göstərilən diqqət və qayğıya görə Azərbaycan Respublikasının Prezidenti cənab İlham Əliyevə, Birinci vitse-prezident Mehriban xanım Əliyevaya və Masallı rayon rəhbərliyinə minnətdarlıqlarını ifadə etmişlər.