08 iyul 2026-cı il tarixdə Masallı Rayon İcra Hakimiyyətinin başçısı Araz Əhmədov Sərçuvar kəndində vətəndaşlarla növbəti səyyar görüş-qəbul keçirib.

Görüşdə çıxış edən rayon rəhbəri Sərçuvar kəndinin tarixi, zəngin mədəni irsi, ziyalıları, ağsaqqalları, əhalinin məşğulluğu və ərazinin sosial-iqtisadi inkişafı barədə ətraflı məlumat verib. Araz Əhmədov bildirib ki, vətəndaş müraciətlərinin yerində dinlənilməsi və operativ həlli dövlət-vətəndaş münasibətlərinin daha da möhkəmləndirilməsində mühüm əhəmiyyət kəsb edir. O, qeyd edib ki, əhalinin sosial rifahının yüksəldilməsi və mövcud problemlərin mərhələli şəkildə həlli dövlət siyasətinin əsas prioritet istiqamətlərindəndir.

Görüşdə Masallı Rayon İcra Hakimiyyətinin Sənəd dövriyyəsi, vətəndaş müraciətləri və inzibati işlər şöbəsinin müdiri Famil Cəfərov çıxış edərək əvvəlki səyyar qəbul zamanı vətəndaşlar tərəfindən qaldırılmış məsələlərin icra vəziyyəti barədə məlumat verib. Bildirilib ki, əvvəlki qəbul zamanı 3 vətəndaş tərəfindən 4 məsələ qaldırılıb. Həmin müraciətlərdən 2-si müsbət həll olunub, digər 2 məsələ ilə bağlı isə qanunvericiliyin tələblərinə uyğun olaraq vətəndaşlara müvafiq izahat və cavab verilib.

Səyyar qəbul zamanı kənd sakinləri tərəfindən əsasən sosial və şəxsi xarakterli müraciətlər səsləndirilib. Qaldırılan məsələlər məsul əməkdaşlar tərəfindən qeydə alınıb, rayon rəhbərinin tapşırığına əsasən aidiyyəti qurumlara müvafiq göstərişlər verilib və müraciətlərin operativ araşdırılması tapşırılıb.

Araz Əhmədov çıxışında vurğulayıb ki, yaşayış məntəqələrinin sosial problemlərinin həlli daim diqqət mərkəzində saxlanılır və bu istiqamətdə həyata keçirilən tədbirlər bundan sonra da ardıcıl şəkildə davam etdiriləcək. Rayon rəhbəri hər bir vətəndaş müraciətinə həssaslıqla yanaşıldığını bildirərək, səlahiyyətlər çərçivəsində bütün məsələlərin diqqətlə araşdırılacağını və həlli istiqamətində zəruri addımların atılacağını qeyd edib.