12 avqust 2026-cı il tarixdə Masallı Rayon İcra Hakimiyyətinin başçısı Araz Əhmədov Tüklə ərazisinin Məmmədoba kəndində sakinlərlə növbəti səyyar görüş-qəbul keçirib.

Görüşü giriş sözü ilə açan rayon rəhbəri Tüklə ərazisinin tarixi, ziyalıları, ağsaqqalları, mədəniyyəti, məşğuliyyəti və sosial-iqtisadi inkişafı barədə məlumat verib. Araz Əhmədov vətəndaş müraciətlərinin yerində dinlənilməsinin və onların operativ həllinə çalışılmasının dövlət-vətəndaş münasibətlərinin möhkəmləndirilməsi baxımından mühüm əhəmiyyət daşıdığını bildirib.

Sənədlərlə və vətəndaşların müraciətləri ilə iş sektorunun müdiri Niyazi Bağırov əvvəlki səyyar qəbul zamanı ərazi sakinləri tərəfindən 3 vətəndaşın 5 məsələ ilə bağlı müraciət etdiyini diqqətə çatdırıb. Bildirib ki, qaldırılan məsələlərlə bağlı vətəndaşlara qanunvericiliyin tələblərinə uyğun izahatlar verilib.

Növbəti qəbul zamanı isə sakinlər tərəfindən əsasən sosial və şəxsi xarakterli məsələlərlə bağlı müraciətlər səsləndirilib. Vətəndaşların müraciətləri qeydə alınıb, onların araşdırılması və həlli ilə bağlı aidiyyəti qurumlara müvafiq tapşırıqlar verilib.

Rayon rəhbəri çıxışında yaşayış məntəqələrinin sosial problemlərinin həllinin daim diqqət mərkəzində saxlanıldığını bildirib. Araz Əhmədov bu istiqamətdə tədbirlərin mərhələli şəkildə davam etdiriləcəyini qeyd edərək sakinləri fəal olmağa, onları narahat edən məsələlərlə bağlı müraciət etməyə çağırıb.

Görüş zamanı səsləndirilən hər bir müraciətin diqqətlə araşdırılacağını və qanunvericiliklə müəyyən edilmiş səlahiyyətlər çərçivəsində həlli istiqamətində zəruri tədbirlərin görüləcəyini vurğulayan rayon rəhbəri sakinlərin problemlərinin aidiyyəti üzrə nəzarətdə saxlanılmasını tapşırıb.

Sakinlər onlara göstərilən diqqət və qayğıya görə Azərbaycan Respublikasının Prezidenti cənab İlham Əliyevə, Birinci vitse-prezident Mehriban xanım Əliyevaya və rayon rəhbərliyinə minnətdarlıqlarını bildiriblər.