12.06.2026-cı il tarixdə “Azadlıq qəzeti”nin Facebook səhifəsində “Masallı sakini maşınını niyə yandırdı?” başlıqlı video-material yayımlanmışdır. Həmin materialda Masallı rayonunun Sığdaş kənd sakini, 1983-cü il təvəllüdlü Şirxan Əliyevin 10 dəfə Masallı RİH başçısının qəbulunda olması, uşaqlarının xəstə olmasını və imkansızlığını nəzərə alaraq ona maddi köməklik göstərilməsini xahiş etməsi, lakin heç bir köməklik olmadığına görə çarəsizlik həddinə çataraq sonda etiraz əlaməti kimi avtomobilini yandırması barədə məlumat verilir. 

Bildiririk ki, video-materialda gedən məlumatlar tam qərəzli və böhtan xarakterlidir və rayon icra hakimiyyətinin fəaliyyətinə kölgə salmaq məqsədi daşıyır. Vətəndaşın avtomobilini yandırmasının səbəbləri isə tam başqadır. Belə ki, Ş.Əliyev 2025-ci ilin mart ayında ona təyin olunmuş ünvanlı sosial yardımın adına avtomobil olduğuna görə dayandırılmasına etiraz əlaməti olaraq həmin "Opel" markalı avtomobili Masallı RİH binasının qarşısındakı meydanın giriş hissəsində yandırmışdır.

Vətəndaşa həmişə dövlət tərəfindən dəstək göstərilmiş, ona 2021-ci ildə özünüməşğulluq çərçivəsində Dövlət Məşğulluq Agentliyi tərəfindən 3 baş iri buynuzlu mal-qara verilmiş, müxtəlif vaxtlarda ailəyə Masallı RİH, icra nümayəndəliyi və bələdiyyə tərəfindən ümumilikdə 600 manat maddi köməkliklər edilmiş, ərzaq yardımları, beş nəfər məktəbli uşaqlarına məktəb çantası və dərs ləvazimatları verilmişdir. Bununla yanaşı, Ş.Əliyev 2025-ci ilin mart ayından may ayınadək hər ay 663,34 manat sosial yardım almış, həyat yoldaşına çoxuşaqlı ana kimi hər ay 840 manat məbləğində müavinət ödənilir.

Məlumat üçün bildiririk ki, psixoloji problemləri olan Ş.Əliyev 12.06.2025-ci il tarixində ünvanlı sosial yardımın dayandırılması ilə bağlı Masallı RİH başçısının Sığdaş kənd inzibati ərazi dairəsi üzrə nümayəndəliyinin inzibati binasının giriş qapısı və pəncərəsini qıraraq maddi ziyan vurmuş və Masallı Rayon Polis Şöbəsinə aparılaraq törətdiyi əmələ görə barəsində qanunamüvafiq tədbir görülmüşdür.

Ş.Əliyevin Masallı Rayon İcra Hakimiyyətinin binasının yaxınlığındakı meydanda maşınını yandırması məkrli xarakter daşıyır və onun ayrı-ayrı adamlar tərəfindən öyrədilməsi ehtimal olunur. Masallı rayon İcra Hakimiyyəti adına atılan böhtanları qətiyyətlə rədd edir və belə qərəzli məlumatları yayan şəxslərdən öz çirkin əməllərindən əl çəkmələrini tələb edir.