Masallı rayon sakini Rufullayev Oktay Əsəd oğlunun “Azəriqaz” İstehsalat Birliyinin Baş direktoru Azər Məmmədov ünvanına etdiyi şikayətlə bağlı mediaya müraciəti ictimai müzakirələrə səbəb olub. Şikayət ərizəsinin surəti də redaksiyaya təqdim edilib.

CenubMedia XəzərNews.az-a istinadən xəbər verir ki, vətəndaşın iddiasına əsasən, 21 may 2026-cı il tarixində Masallı Regional Qaz İstismar Sahəsinin əməkdaşları tərəfindən yaşadığı fərdi yaşayış evinin qaz təchizatı əvvəlcədən rəsmi xəbərdarlıq edilmədən dayandırılıb.

Oktay Rufullayev bildirir ki, məsələ ilə bağlı aidiyyəti quruma müraciət etdikdə ona 2024-cü ilə aid 357 manat məbləğində cərimə borcunun olduğu deyilib. Onun sözlərinə görə, həmin dövr ərzində nə rəsmi bildiriş təqdim olunub, nə də aylıq ödəniş qəbzlərində hər hansı borc göstərilib.

Şikayətçinin sözlərinə görə, yalnız 2026-cı ildə SMS vasitəsilə məlumat aldıqdan sonra idarəyə yaxınlaşıb. O qeyd edir ki, cərimənin hüquqi əsaslarını təsdiq edən sənədləri tələb etsə də, ona hər hansı rəsmi sənəd təqdim edilməyib. Daha sonra “ASAN Xidmət”ə müraciət edən vətəndaşa sistemdə adına qeydiyyata alınmış hər hansı cərimənin görünmədiyi bildirilib.

Müraciətdə qeyd olunur ki, 2024-cü ilin sentyabr ayında evin yaxınlığında baş vermiş hadisə nəticəsində qaz sayğacına zərər dəyib. Bununla bağlı dərhal aidiyyəti qurumlara məlumat verildiyi, hadisə yerinə baxış keçirən əməkdaşlar tərəfindən sayğacın dəyişdirildiyi bildirilir. Şikayətçinin iddiasına görə, polis arayışı təqdim olunub və sayğacın dəyəri kimi 93 manat ödəniş edilib. Həmin vaxt ona əlavə cərimə tətbiq edilməyəcəyi deyilib.

Buna baxmayaraq, vətəndaş bildirir ki, 21 may 2026-cı ildə Masallı qaz sahəsinin əməkdaşları — İlham İmanov və Sənan adlı işçi tərəfindən qaz təchizatı dayandırılıb. Rufullayev həmçinin əməkdaşların kobud davranış nümayiş etdirdiyini də iddia edib.

Şikayətçi aidiyyəti qurumlardan məsələnin araşdırılmasını, 357 manatlıq cərimənin hüquqi əsaslarının açıqlanmasını, qazın dayandırılması məsələsinə hüquqi qiymət verilməsini və vətəndaşla kobud rəftar etdiyini iddia etdiyi əməkdaşlar barədə tədbir görülməsini tələb edir.

Qeyd edək ki, məsələ sosial şəbəkələrdə də müzakirə olunub.

Məsələ ilə bağlı qarşı tərəfin mövqeyini dərc etməyə hazırıq.