21 may 2026-cı il tarixdə Masallı Rayon İcra Hakimiyyətinin başçısı Araz Əhmədov tərəfindən vətəndaşların növbəti qəbulu keçirilib.

Qəbul zamanı rayonun müxtəlif yaşayış məntəqələrindən olan sakinlər iştirak edərək onları narahat edən məsələlər və təkliflərlə bağlı müraciətlərini rayon rəhbərinin diqqətinə çatdırıblar.

Görüş zamanı vətəndaşların müraciətləri əsasən sosial-məişət problemləri, məşğulluq, torpaq məsələləri, sosial təminat və digər mövzuları əhatə edib.

İlk müraciət Sərçuvar kəndi sakini tərəfindən səsləndirilib. Vətəndaş qonşuluğunda fermer təsərrüfatı ilə məşğul olan şəxs tərəfindən əraziyə yayılan xoşagəlməz qoxuların yaşayış şəraitinə mənfi təsir göstərdiyini bildirib. Eyni zamanda torpaq vergisi borcu ilə bağlı müraciətini də rayon rəhbərinin diqqətinə çatdırıb.

Növbəti müraciət Xırmandalı kəndi sakini tərəfindən edilib. Vətəndaş barəsində edilən şikayətlə bağlı məsələnin obyektiv və qısa müddətdə araşdırılmasına köməklik göstərilməsini xahiş edib. Həmçinin sosial təminatla bağlı müraciət edərək pensiyasının dayandırıldığını bildirib və bu məsələdə dəstək göstərilməsini istəyib.

Digər müraciət Qızılağac kəndi sakini tərəfindən övladının səhhəti ilə əlaqədar qaldırılıb. Vətəndaş müvafiq dəstəyin göstərilməsi ilə bağlı müraciət edib.

Qəbul zamanı rayon rəhbəri hər bir vətəndaşın müraciətini diqqətlə dinləyərək qaldırılan məsələlərin qanunvericiliyin tələblərinə uyğun araşdırılması və həlli istiqamətində aidiyyəti qurumlara müvafiq tapşırıqlar verib.

Bir sıra müraciətlər yerindəcə öz həllini tapıb, əlavə araşdırma tələb edən məsələlər isə nəzarətə götürülərək aidiyyəti struktur bölmələrinə icrası üçün yönləndirilib.