Masallıda miqrasiya qaydaları ilə bağlı maarifləndirmə tədbiri keçirildi
14 may 2026-cı il tarixində Masallı Rayon İcra Hakimiyyətində Lənkəran Regional Miqrasiya İdarəsinin əməkdaşları tərəfindən “Olduğu yer üzrə qeydiyyat, əcnəbi və vətəndaşlığı olmayan şəxslərin olma və yaşama qaydaları” mövzusunda maarifləndirmə tədbiri keçirilmişdir.
Tədbiri Masallı Rayon İcra Hakimiyyəti başçısı aparatının Ərazi-təşkilat və ictimai-siyasi məsələlər şöbəsi müdirinin müavini, Ərazi-təşkilat məsələləri sektorunun müdiri Nahid Həsənov açaraq tədbirin əhəmiyyətindən bəhs etmiş, bu cür maarifləndirici görüşlərin vətəndaşların məlumatlandırılması baxımından mühüm rol oynadığını vurğulamışdır.
Əvvəlcə Ümummilli Lider Heydər Əliyevin və Vətənimizin ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilmişdir.
Tədbirdə Lənkəran Regional Miqrasiya İdarəsinin şöbə rəisi, miqrasiya xidməti müşaviri İbrahim Abdullazadə və baş inspektor, I dərəcəli miqrasiya xidməti qulluqçusu Turan Əliyev çıxış edərək mövzu ilə bağlı ətraflı məlumat vermişlər. Çıxışlarda əcnəbilərin və vətəndaşlığı olmayan şəxslərin ölkə ərazisində olma və yaşama qaydaları, olduğu yer üzrə qeydiyyat prosedurları, müvafiq qanunvericiliyin tələbləri və hüquqi məsuliyyət məsələləri iştirakçıların diqqətinə çatdırılmışdır.
Tədbirin sonunda iştirakçıları maraqlandıran suallar cavablandırılmış, qanunvericiliyin tətbiqi ilə bağlı geniş izahatlar verilmiş və bu sahədə maarifləndirmə işinin davam etdirilməsinin vacibliyi qeyd olunmuşdur.
