Mayın 5-də Masallı rayon Mərkəzi Kitabxanasında Azərbaycan Yazıçılar və Jurnalistlər Birliyinin üzvü, tanınmış ədib Ələşrəf Niftiyevin yeni çapdan çıxmış “Ömür səhifələrindən hekayətlər” adlı kitabının təqdimatı keçirilib.

Tədbirdə rayon ziyalıları və Masallı Dövlət Regional Kollecin tələbələri iştirak ediblər. Tədbir başlamazdan öncə vətənimizin suverenliyi uğrunda canından keçən şəhidlərimizin və dünyasını dəyişən şair və yazıçılarımızın əziz xatirəsi bir dəqiqəlik sükutla yad edilib.
Tədbirdə ilk çıxış edən Masallı rayon MKS-nin direktoru Zamin Məmmədov qonaqları salamlayaraq, Ələşrəf Niftiyevin yaradıcılığının Masallı ədəbi mühitindəki rolundan bəhs edib. O, müəllifin yeni kitabının oxucular, xüsusilə də gənclər üçün mənəvi-əxlaqi dəyərlərin təbliği baxımından çox qiymətli olduğunu vurğulayıb.

Sonra yazıçı-publisist Xodaşirin Cəbiyev (Cabbarlı), Masallı rayon İH-nin İctimai-siyasi və humanitar məsələlər şöbəsinin Baş məsləhətçisi Nuranə Muradova,əməkdar jurnalist, tanınmış yazar Zakir Abbas, “Yeni Həyat” qəzetinin redaktoru Əlihüseyn Şükürov və digərləri yazıçının bu kitabda dünyada gedən hadisələri qələm dili ilə çatdırdığını diqqətə çatdırıblar. Çıxışlarda rəvan və səlis dildə yazılan bu kitabın gələcək nəsillərə ərməğan olunacağı əminliklə qeyd olunub.

Sonda müəllif Ələşrəf Niftiyev çıxış edərək minnətdarlığını bildirib, kitabın ərsəyə gəlməsi prosesi haqqında qısa məlumat verib. Daha sonra oxucuların müəllifə ünvanladıqları suallar cavablandırılıb, fikir mübadiləsi aparılıb və görüş maraqlı müzakirələrlə yekunlaşıb.

Tədbir çərçivəsində müəllifin kitablarından ibarət zəngin sərgi də təşkil olunaraq iştirakçılara təqdim edilib.