
Mayın 1-2-də Masallı Olimpiya Kompleksində Lənkəran-Astara Regional Gənclər və İdman İdarəsi və Masallı Uşaq-Gənclər İdman-Şahmat Məktəbinin birgə təşkilatçılığı ilə Ümummilli lider Heydər Əliyevin anadan olmasının 103-cü ildönümünə həsr olunmuş yeniyetmə oğlanlar arasında voleybol üzrə rayon turniri baş tutub.
İki gün davam edən yarışda rayonun müxtəlif ümumtəhsil məktəblərinin komandaları iştirak edərək qalibiyyət uğrunda mübarizə aparıblar. Gərgin və maraqlı keçən qarşılaşmaların nəticəsinə əsasən, Türkoba kənd S.Vurğun adına tam orta ümumtəhsil məktəbinin komandası I yerə layiq görülüb. Hişkədərə kənd E.Ağayev adına tam orta ümumtəhsil məktəbinin komandası II yerin, Qodman kənd C.Kazımov adına tam orta ümumtəhsil məktəbinin komandası isə III yerin sahibi olub.
Sonda qalib komandalar Lənkəran-Astara Regional Gənclər və İdman İdarəsi tərəfindən diplomlarla təltif ediliblər. Turnirin keçirilməsində əsas məqsəd yeniyetmələr arasında idmana marağın artırılması, sağlam həyat tərzinin təbliği və voleybolun inkişafına töhfə vermək olub.