Masallı rayonunda “Azərbaycanın siyasi, iqtisadi və hərbi qüdrətinin inkişafında Heydər Əliyevin rolu” mövzusunda konfrans təşkil olunub. Tədbir Masallı Rayon İcra Hakimiyyəti, Yeni Azərbaycan Partiyasının Masallı Rayon Təşkilatı və Masallı Dövlət Regional Kollecinin birgə təşkilatçılığı ilə baş tutub.

Konfransda Masallı Rayon İcra Hakimiyyətinin başçısı Araz Əhmədov, Milli Məclisin deputatı Məşhur Məmmədov, Yeni Azərbaycan Partiyası aparatının məsul əməkdaşı Əli Axundov, YAP Masallı rayon təşkilatının sədri Seyfəddin Əliyev, rayonun hüquq-mühafizə orqanlarının rəhbərləri, Masallı Dövlət Regional Kollecinin direktoru Rövşən Muxtarov, şəhid ailələri, ictimaiyyət nümayəndələri və müxtəlif idarə, müəssisə və təşkilatların əməkdaşları iştirak ediblər.

Çıxış edənlər Ulu Öndər Heydər Əliyevin Azərbaycan dövlətçiliyinin möhkəmləndirilməsi və inkişafındakı müstəsna xidmətlərindən geniş bəhs ediblər. Bildirilib ki, dahi şəxsiyyətin xalqımız qarşısındakı əvəzsiz xidmətləri, müasir dövlətimizin formalaşması üçün yaratdığı möhkəm təməl bu gün də böyük qürur və minnətdarlıq hissi ilə xatırlanır.

Tədbirin sonunda Yeni Azərbaycan Partiyasının Masallı Rayon Təşkilatı tərəfindən konfrans iştirakçılarına fəxri fərmanlar təqdim olunub, xatirə fotosu çəkdirilib.

Qeyd olunub ki, Ulu Öndər Heydər Əliyevin əziz xatirəsi hər bir azərbaycanlının qəlbində daim yaşayır, onun ideyaları isə Azərbaycanın gələcək inkişaf yoluna işıq salmağa davam edir.