Dünya Kubokunda Azərbaycan kişi boks millisi uğurlu çıxışı ilə diqqət mərkəzində
Braziliyanın Fos-du-Iquaçu şəhərində keçirilən Dünya Kubokunda Azərbaycan kişi boks millisi uğurlu çıxışı ilə diqqət mərkəzinə düşüb.
49 ölkənin iştirak etdiyi nüfuzlu beynəlxalq turnirdə Azərbaycan yığması medal sıralamasında 2-ci pillədə qərarlaşıb. Komandamız 3 qızıl, 0 gümüş və 1 bürünc olmaqla ümumilikdə 4 medal qazanaraq yalnız ev sahibi Braziliyadan geri qalıb.
Turnirin lideri Braziliya 4 qızıl, 3 gümüş və ümumilikdə 7 medalla birinci yerdə qərarlaşıb. Azərbaycan isə güclü rəqibləri geridə qoyaraq Çin, Polşa və Qazaxıstan kimi iddialı komandaları qabaqlayıb.
Bu nəticə Azərbaycan boksunun beynəlxalq arenada artan nüfuzunun və idmançılarımızın yüksək hazırlıq səviyyəsinin bariz göstəricisidir. Dünya Kubokunda əldə olunan bu uğur qarşıdakı beynəlxalq yarışlar üçün də böyük stimul hesab olunur.
Azərbaycan Boks Federasiyasının rəhbərliyi və məşqçi heyətinin məqsədyönlü fəaliyyəti nəticəsində milli komandamız dünya arenasında növbəti dəfə öz gücünü sübut etmiş oldu.
