Masallıda Təhsil infrastrukturunun yenilənməsi istiqamətində işlər davam etdirilir
Təhsil infrastrukturunun yenilənməsi, məktəblərdə tədris şəraitinin yaxşılaşdırılması və şagirdlərin müasir standartlara cavab verən təhsil mühiti ilə təmin olunması istiqamətində Masallı rayonunda həyata keçirilən tədbirlər davam etdirilir.
Bu gün Masallı Rayon Təhsil Sektorunun müdiri Elman Rzayev rayonun C.Cabbarlı adına Ərkivan qəsəbə 1 nömrəli və Mahmudvar kənd 1 nömrəli tam orta məktəblərində aparılan təmir işlərinin gedişi ilə tanış olub.
Tanışlıq zamanı məktəblərdə görülən işlərin hazırkı vəziyyəti, təmir prosesinin keyfiyyəti, qarşıda duran işlər və onların icra müddətləri nəzərdən keçirilib. Təmir işlərinin müəyyən olunmuş müddətdə, yüksək keyfiyyətlə və mövcud tələblərə uyğun şəkildə başa çatdırılması ilə bağlı müvafiq tapşırıq və tövsiyələr verilib.
Bildirilib ki, həyata keçirilən təmir və yenilənmə işlərinin əsas məqsədi şagird və müəllimlər üçün müasir, təhlükəsiz və əlverişli tədris mühitinin yaradılması, həmçinin təhsil müəssisələrinin maddi-texniki bazasının daha da gücləndirilməsidir.
Masallı rayonunda təhsil infrastrukturunun yenilənməsi, məktəblərin maddi-texniki imkanlarının yaxşılaşdırılması və tədris şəraitinin müasir tələblərə uyğunlaşdırılması istiqamətində işlər bundan sonra da ardıcıl şəkildə davam etdiriləcək.
