Masallı məktəblilərinin Respublika Fənn Olimpiadasında uğuru
Masallı rayon Təhsil sektorunun müdiri Elman Rzayev Respublika Fənn Olimpiadasında yüksək nəticə göstərən şagirdlərlə görüş keçirib, onları qazandıqları uğurlar münasibətilə təbrik edib.
Görüş zamanı bildirilib ki, Respublika Fənn Olimpiadasında əldə olunan nailiyyətlər Masallı təhsilinin inkişafının və şagirdlərin yüksək bilik səviyyəsinin göstəricisidir. Qeyd olunub ki, bu uğurlar rayonun təhsil sahəsində görülən məqsədyönlü işlərin nəticəsidir və hər bir masallılı üçün qürur mənbəyidir.
Masallı şəhəri İsfəndiyar Zülalov adına 5 nömrəli tam orta ümumtəhsil məktəbinin XI sinif şagirdi Bəşirova Mahirə Rövşən qızı Respublika Fənn Olimpiadasında qızıl medala layiq görülüb.
Ərkivan qəsəbəsi (Bədirli kənd) Z. Nəcəfov adına 2 saylı tam orta məktəbinin X sinif şagirdi Cəlallı Hikmət Cavid oğlu isə olimpiadada gümüş medal qazanıb.
Təhsil sektorunun müdiri Elman Rzayev şagirdlərlə söhbət zamanı onların gələcək təhsil həyatında da uğurlar arzulayıb, valideynlərə, müəllimlərə və məktəb kollektivlərinə göstərdikləri dəstəyə görə təşəkkürünü bildirib.
Sonda qalib şagirdlər, onların valideynləri, müəllimləri və məktəb kollektivləri bir daha təbrik olunub, onlara yeni uğurlar və daha böyük nailiyyətlər arzulanıb.
Masallı təhsilinin bu uğuru rayon ictimaiyyəti tərəfindən böyük sevinclə qarşılanıb.
