02 sentyabr 2026-cı il tarixində Qəriblər ərazisində Masallı Rayon İcra Hakimiyyətinin başçısı Araz Əhmədovun sakinlərlə növbəti səyyar görüş-qəbulu keçirilib.

Görüşü açan rayon icra hakimiyyətinin başçısı Araz Əhmədov Qəriblər ərazisinin tarixi, ziyalıları, ağsaqqalları, mədəniyyəti, əhalinin məşğuliyyəti, eləcə də sosial-iqtisadi inkişafı barədə məlumat verib.

Rayon rəhbəri vətəndaş müraciətlərinin yerində dinlənilməsinin, qaldırılan məsələlərin araşdırılaraq operativ həllinin dövlət-vətəndaş münasibətlərinin daha da möhkəmləndirilməsində mühüm əhəmiyyət daşıdığını diqqətə çatdırıb.

Görüşdə çıxış edən Masallı Rayon İcra Hakimiyyəti başçısı aparatının Sənəd dövriyyəsi, vətəndaş müraciətləri və inzibati işlər şöbəsinin müdiri Famil Cəfərov bildirib ki, ərazidə əvvəlki səyyar qəbul zamanı 2 vətəndaş tərəfindən 2 məsələ qaldırılıb. Müraciətlərlə bağlı vətəndaşlara qanunvericiliyin tələblərinə uyğun müvafiq izahatlar verilib.

Səyyar qəbul zamanı sakinlər tərəfindən əsasən sosial və şəxsi xarakterli məsələlərlə bağlı müraciətlər səsləndirilib. Vətəndaşların müraciətləri məsul əməkdaşlar tərəfindən qeydə alınıb, qaldırılan məsələlərin araşdırılması və həlli məqsədilə rayon rəhbəri tərəfindən aidiyyəti üzrə müvafiq tapşırıqlar verilib.

Araz Əhmədov çıxışında yaşayış məntəqələrinin sosial problemlərinin həllinin daim diqqət mərkəzində saxlanıldığını bildirib. Qeyd edib ki, bu istiqamətdə tədbirlər mərhələli şəkildə davam etdiriləcək. Rayon rəhbəri sakinləri fəal olmağa çağıraraq, hər bir müraciətin diqqətlə araşdırılacağını və qanunvericiliyin tələblərinə uyğun olaraq səlahiyyətlər çərçivəsində həllinə çalışılacağını vurğulayıb.

Səyyar görüş-qəbul sakinlər tərəfindən razılıqla qarşılanıb. Vətəndaşlar onlara göstərilən diqqət və qayğıya görə Azərbaycan Respublikasının Prezidenti cənab İlham Əliyevə, Birinci vitse-prezident Mehriban xanım Əliyevaya və rayon rəhbərliyinə minnətdarlıqlarını bildiriblər.