18 iyun 2026-cı il tarixində Masallı Rayon İcra Hakimiyyətinin başçısı cənab Araz Əhmədov tərəfindən növbəti vətəndaş qəbulu keçirilmişdir. Qəbul zamanı rayon sakinlərinin müxtəlif sahələri əhatə edən müraciətləri dinlənilmiş, onların qaldırdıqları məsələlərin həlli istiqamətində müvafiq tapşırıqlar verilmişdir.

Qəbulda ilk olaraq Masallı şəhər sakini məşğulluq və tikinti məsələləri ilə bağlı müraciət etmişdir.

Daha sonra Boradigah qəsəbə sakini şəxsi xarakterli məsələ ilə əlaqədar müraciətini diqqətə çatdırmışdır.

 Molloba kənd sakini yaşadığı ərazidə küçənin asfalt örtüyünün çəkilməsi ilə bağlı xahişini səsləndirmişdir.

 Növbəti müraciət Masallı şəhər sakini tərəfindən ünvanlı dövlət sosial yardımı ilə əlaqədar olmuşdur. 

Şərəfə kənd sakini torpaq məsələləri ilə bağlı müraciət etmişdir.

Güllütəpə kənd sakini isə əlillik dərəcəsinin müəyyən edilməsi və məşğulluq məsələləri ilə bağlı müraciətini rayon rəhbərinin diqqətinə çatdırmışdır.

Qəbul zamanı səsləndirilən digər müraciətlər də rayon rəhbəri tərəfindən həssaslıqla dinlənilmiş, qaldırılan məsələlərin qanunvericiliyin tələblərinə uyğun həlli istiqamətində müvafiq tədbirlərin görülməsi məqsədilə aidiyyəti qurumların rəhbərlərinə tapşırıqlar verilmişdir. Müraciətlərin bir qismi yerindəcə öz müsbət həllini tapmış, əlavə araşdırma tələb edən məsələlər isə nəzarətə götürülərək aidiyyəti təşkilatlara yönləndirilmişdir.