Masallıda “İdman hamı üçün” layihəsi çərçivəsində kütləvi açıq idman tədbiri keçirilib
Mayın 18-də Lənkəran-Astara Regional Gənclər və İdman İdarəsinin təşkilatçılığı ilə Masallı şəhər Nizami Gəncəvi adına xatirə parkında “İdman hamı üçün” layihəsi çərçivəsində kütləvi açıq idman tədbiri təşkil olunub.
Tədbirin əsas məqsədi əhali arasında sağlam həyat tərzinin təbliği, idmana marağın artırılması və müxtəlif idman növlərinin geniş ictimaiyyətə tanıdılması olub. Açıq havada keçirilən tədbirdə Masallı Uşaq-Gənclər İdman Məktəbinin müəllimləri, idmançıları və şəhər sakinləri fəal iştirak ediblər.
Tədbir çərçivəsində idmançılar müxtəlif idman növləri üzrə nümunəvi çıxışlarla tamaşaçılar qarşısında bacarıqlarını nümayiş etdiriblər. Xüsusilə cüdo, boks, sərbəst güləş, yunan-Roma güləşi, badminton və dama üzrə təqdim olunan çıxışlar iştirakçılar və izləyicilər tərəfindən böyük maraq və alqışla qarşılanıb. Gənc idmançıların nümayiş etdirdiyi peşəkar hazırlıq onların idmana olan həvəsini və gələcək uğurlara olan potensialını bir daha göstərib.
