Masallının kənd və qəsəbələrində asfaltlaşdırma işləri uğurla davam etdirilir
Masallı rayonunda yol infrastrukturunun yaxşılaşdırılması və abadlıq-quruculuq tədbirləri davam edir. Masallı Rayon İcra Hakimiyyətinin başçısı Araz Əhmədov Təzə Alvadı, Banbaşı kəndi, Ərkivan qəsəbəsi və Hişkədərə kəndində həyata keçirilən asfaltlaşdırma işləri ilə yerində tanış olub.
Təzə Alvadıda şəhid Sənan Səlimovun adını daşıyan küçədə 1 kilometr uzunluğunda yol asfaltlanaraq istifadəyə verilib. Banbaşı kəndində Məscid yolunun 300 metrlik hissəsinə və Şəhid Cavanşir Qasımov adına kənd tam orta məktəbinin giriş hissəsinə asfalt örtüyü salınıb. Ərkivan qəsəbəsinin Zeynoba məhəlləsində 320 metr uzunluğunda yol asfaltlanıb, eyni zamanda suötürücü kanallar qazılaraq müvafiq borular quraşdırılıb. Hişkədərə kəndində isə şəhid Elşad Ağayevin adını daşıyan 340 metrlik küçəyə yeni asfalt örtüyü döşənib.
Həyata keçirilən layihələr nəticəsində sakinlərin rahat və təhlükəsiz hərəkəti üçün əlverişli şərait yaradılıb, yaşayış məntəqələrinin yol infrastrukturu daha da yaxşılaşdırılıb. Rayon rəhbəri abadlıq-quruculuq və infrastruktur layihələrinin bundan sonra da ardıcıl şəkildə davam etdiriləcəyini bildirib. Sakinlər və şəhid ailələri göstərilən diqqət və qayğıya görə minnətdarlıqlarını ifadə ediblər.
