26 sentyabr 2026-cı ildə Azərbaycan Prezidenti İlham Əliyevin himayəsi altında keçirilən Forum çərçivəsində “Parçalanmış dünyada etimadın bərpası: Cənubi Qafqaz qlobal bağlantı və investisiya sabitliyinin dayağı kimi” mövzusunda tədbir təşkil olunub. Prezident İlham Əliyev burada moderator Adebayo Oqunlesinin suallarını cavablandıraraq Azərbaycanın iqtisadi inkişafının nəticələri, investisiya mühiti, enerji siyasəti, nəqliyyat və rəqəmsal bağlantılar, insan kapitalı və gələcək iqtisadi prioritetlər barədə fikirlərini bölüşüb.
Prezidentin çıxışında diqqəti cəlb edən əsas məqamlardan biri Azərbaycanın son iyirmi ildən artıq müddətdə keçdiyi iqtisadi transformasiyanın konkret göstəricilər əsasında təqdim olunması idi. Forumun moderatoru da Azərbaycanın ÜDM-nin əhəmiyyətli dərəcədə artmasını, yoxsulluğun azalmasını, Dövlət Neft Fondunun aktivlərinin genişlənməsini və qeyri-neft-qaz sektorunun iqtisadiyyatda artan çəkisini qeyd edib. Bu göstəricilər Azərbaycanın iqtisadi siyasətinin yalnız cari nəticələr deyil, uzunmüddətli institusional və maliyyə imkanları yaratmaq istiqamətində qurulduğunu nümayiş etdirən faktlar kimi təqdim olunub.

Azərbaycanın qarşıdakı inkişaf mərhələsində əsas məsələlərdən biri iqtisadi artımın yeni mənbələrinin formalaşdırılmasıdır. Prezident İlham Əliyevin çıxışında qeyri-neft-qaz sektorunun inkişafına xüsusi diqqət yetirilməsi də məhz bu kontekstdə mühüm əhəmiyyət daşıyır. Ölkə iqtisadiyyatının strukturunda qeyri-neft-qaz sahələrinin çəkisinin yüksəlməsi Azərbaycanın gələcək iqtisadi modelində diversifikasiyanın əsas istiqamətlərdən biri olduğunu göstərir. Burada investisiya anlayışına yalnız maliyyə vəsaitlərinin ölkəyə gətirilməsi kimi yanaşılmaması xüsusilə diqqətçəkəndir. Müasir investisiya həm də texnologiyanın, idarəçilik təcrübəsinin, yeni istehsal mədəniyyətinin, peşəkar kadrların və beynəlxalq biznes standartlarının ölkəyə daxil olması deməkdir. Prezident İlham Əliyev də forum zamanı texnologiyaların əldə edilməsinin mümkünlüyünü qeyd etməklə yanaşı, beynəlxalq təcrübənin əhəmiyyətini xüsusi vurğulayıb.

 Prezident İlham Əliyevin çıxışında təhlükəsizlik və sabitlik məsələlərinin investisiya mühitinin vacib şərtlərindən biri kimi təqdim olunması da diqqət çəkir. Beynəlxalq biznes mühitində uzunmüddətli sərmayə qərarları üçün proqnozlaşdırıla bilən iqtisadi və siyasi şərait mühüm amillərdən hesab olunur. Bu baxımdan Azərbaycanın investorlarla dialoqda sabitlik, əlverişli biznes mühiti və uzunmüddətli əməkdaşlıq məsələlərini önə çıxarması ölkənin investisiya siyasətinin əsas istiqamətlərindən birini xarakterizə edir. II Azərbaycan Beynəlxalq İnvestisiya Forumunun nəticələri də bu dialoqun praktiki xarakter daşıdığını göstərdi.Prezident İlham Əliyevin forumdakı çıxışını fərqləndirən məqamlardan biri də Azərbaycanın gələcəyə yalnız mövcud resursların hesabına deyil, yeni əməkdaşlıq imkanlarının yaradılması üzərindən baxmasıdır. İnvestorlarla münasibətdə əsas məqsəd kapitalın cəlb edilməsi ilə yanaşı, həmin kapitalın ölkənin texnoloji, institusional və insan kapitalının inkişafına töhfə verməsidir. Belə yanaşma investisiyanı qısamüddətli maliyyə axınından daha geniş — iqtisadi inkişafın struktur alətinə çevirir.

Prezident İlham Əliyevin II Azərbaycan Beynəlxalq İnvestisiya Forumu çərçivəsində keçirilən tədbirdə çıxışı Azərbaycanın iqtisadi inkişaf gündəliyinin bir sıra mühüm istiqamətlərini — investisiya, texnologiya, insan kapitalı, enerji, rəqəmsallaşma, regional bağlantılar və iqtisadi şaxələndirməni vahid çərçivədə təqdim etdi. Çıxışda səsləndirilən fikirlər Azərbaycanın özünü yalnız investisiya qəbul edən ölkə kimi deyil, regional və qlobal iqtisadi əməkdaşlığın fəal iştirakçısı kimi təqdim etdiyini göstərir.
Bu baxımdan II Azərbaycan Beynəlxalq İnvestisiya Forumu Azərbaycanın iqtisadi potensialının beynəlxalq müstəvidə nümayiş etdirilməsi ilə yanaşı, qarşıdakı illərin investisiya gündəliyinin konturlarının müəyyənləşdirildiyi platforma kimi də yadda qalır. Azərbaycanın əsas məqsədi mövcud iqtisadi imkanları yeni texnologiyalar, beynəlxalq təcrübə və uzunmüddətli tərəfdaşlıqla birləşdirərək daha şaxələndirilmiş, dayanıqlı və rəqabətqabiliyyətli iqtisadi sistem formalaşdırmaqdır. Forumun nəticələri və imzalanmış investisiya sənədləri bu istiqamətdə beynəlxalq əməkdaşlığın konkret layihələr üzərindən davam etdiyini göstərir.

Masallı RİHBA-nın İctimai-siyasi və humanitar məsələlər sektorunun müdiri