Milli Məclisin deputatı Məşhur Məmmədov:

Bakı Enerji Həftəsi Azərbaycanın beynəlxalq enerji siyasətində artan rolunun və strateji əhəmiyyətinin nümayiş olunduğu mühüm platformadır. Prezident İlham Əliyevin tədbirin rəsmi açılış mərasimində səsləndirdiyi fikirlər ölkəmizin enerji siyasətinin əsas istiqamətlərini, əldə olunan nailiyyətləri və gələcək hədəflərini bir daha ortaya qoydu.

Milli Məclisin deputatı Məşhur Məmmədov bildirib ki, son 30 ildə həyata keçirilən məqsədyönlü enerji strategiyası Azərbaycanın iqtisadi qüdrətinin artmasına, beynəlxalq nüfuzunun möhkəmlənməsinə və regional lider dövlətə çevrilməsinə mühüm töhfə verib. Onun sözlərinə görə, Azərbaycan enerji resurslarından yalnız iqtisadi gəlir mənbəyi kimi deyil, həm də milli təhlükəsizliyin, dövlət müstəqilliyinin və beynəlxalq əməkdaşlığın gücləndirilməsi vasitəsi kimi istifadə edib.

Deputat qeyd edib ki, ölkəmizin enerji siyasətinin əsası Ümummilli Lider Heydər Əliyev tərəfindən qoyulub və Prezident İlham Əliyev tərəfindən uğurla davam etdirilir. Məhz bu siyasətin nəticəsində Azərbaycan dünyanın aparıcı enerji tərəfdaşlarından birinə çevrilib, enerji layihələri isə regionun geosiyasi və iqtisadi xəritəsini dəyişib.

Məşhur Məmmədov vurğulayıb ki, Bakı-Tbilisi-Ceyhan, Bakı-Supsa, Cənubi Qafqaz Qaz Kəməri, TANAP və TAP kimi strateji layihələr Azərbaycanın Avropanın enerji təhlükəsizliyində etibarlı tərəfdaş statusunu daha da möhkəmləndirib. Hazırda Azərbaycan qazının ixrac coğrafiyasının genişlənməsi ölkəmizin beynəlxalq enerji bazarındakı mövqeyinin gücləndiyini göstərir.

Deputatın sözlərinə görə, Prezident İlham Əliyevin çıxışında yaşıl enerji sahəsinə xüsusi diqqət ayrılması Azərbaycanın gələcəyə hesablanmış enerji siyasətinin mühüm istiqamətlərindən biridir. Günəş, külək və hidroenerji layihələrinin genişləndirilməsi, Qarabağ və Şərqi Zəngəzurun yaşıl enerji zonasına çevrilməsi, həmçinin beynəlxalq enerji bağlantılarının yaradılması ölkəmizin bərpaolunan enerji sahəsində də lider mövqelərdən birini tutacağını göstərir.

Məşhur Məmmədov bildirib ki, Azərbaycanın enerji siyasəti artıq yalnız karbohidrogen ehtiyatlarının hasilatı və ixracı ilə məhdudlaşmır. Ölkə eyni zamanda enerji, nəqliyyat və logistika sahələrində regional əməkdaşlığın əsas mərkəzlərindən birinə çevrilib. Şərq-Qərb və Şimal-Cənub nəqliyyat dəhlizləri, eləcə də gələcəkdə reallaşacaq Zəngəzur dəhlizi Azərbaycanın tranzit imkanlarını daha da artıracaq.

Deputat qeyd edib ki, Azərbaycanın bugünkü uğurlarının əsasında strateji baxış, milli maraqlara söykənən siyasət və etibarlı tərəfdaşlıq dayanır. Son illərdə formalaşdırılmış enerji diplomatiyası ölkəmizin beynəlxalq mövqelərini möhkəmləndirməklə yanaşı, regionda sabitliyin və əməkdaşlığın güclənməsinə də mühüm töhfə verir.

Məşhur Məmmədovun fikrincə, Bakı Enerji Həftəsi təkcə enerji sənayesinin nümayəndələrinin görüş platforması deyil, həm də yeni tərəfdaşlıqların qurulduğu, qlobal enerji gündəliyinin müzakirə edildiyi və Azərbaycanın strateji rolunun nümayiş olunduğu mühüm beynəlxalq mərkəzdir. Prezident İlham Əliyevin tədbirdə səsləndirdiyi fikirlər isə ölkəmizin enerji təhlükəsizliyi, yaşıl inkişaf və regional inteqrasiya istiqamətində qarşıdakı illər üçün müəyyən etdiyi strateji hədəflərin aydın ifadəsidir.