Lənkəran-Astara RTİ-də yeni təyin olunmuş məktəb rəhbərləri ilə görüş keçirilib
Lənkəran-Astara Regional Təhsil İdarəsi tərəfindən yeni təyin olunmuş ümumtəhsil müəssisələrinin direktor və direktor müavinləri üçün adaptasiya proqramı çərçivəsində görüş keçirilib.
Proqramın məqsədi yeni təyinat alan rəhbər şəxslərin idarəetmə bacarıqlarının formalaşdırılması, təhsil qanunvericiliyinin düzgün tətbiqinin təmin olunması, məktəbdaxili proseslərin səmərəli təşkili üzrə bilik və bacarıqlarının artırılması, həmçinin liderlik və qərarvermə bacarıqlarının inkişaf etdirilməsidir.
Görüş zamanı iştirakçılarla məktəbdaxili idarəetmənin səmərəli təşkili, təhsil müəssisələrində planlaşdırma və hesabatlılıq mexanizmləri, müəllim və şagird kontingentinin düzgün idarə olunması, eləcə də rəhbərlik fəaliyyətində şəffaflıq və məsuliyyət prinsiplərinin tətbiqi ilə bağlı müzakirələr aparılıb.
Eyni zamanda, yeni təyin olunmuş rəhbər şəxslərə fəaliyyətlərinin ilk ilini əhatə edən hesabatın hazırlanması ilə bağlı tapşırıqlar və müvafiq tövsiyələr təqdim olunub.
