26 İyun – Azərbaycan Respublikasının Silahlı Qüvvələri Günü dövlətçilik tariximizin ən şərəfli və qürurverici səhifələrindən biridir. Bu əlamətdar gün, müstəqilliyimizin ilk illərində qarşılaşdığımız ağır sınaqlardan keçərək bu gün dünyanın ən güclü hərbi qüvvələri sırasına yüksələn ordumuzun keçdiyi şanlı inkişaf yolunu təcəssüm etdirir.

Azərbaycan Silahlı Qüvvələrinin formalaşması və peşəkar kadr potensialının yaradılması birbaşa Ümummilli Lider Heydər Əliyevin adı ilə bağlıdır. Hələ 1969-cu ildə hakimiyyətə gəlişindən sonra onun uzaqgörən fəaliyyəti sayəsində ölkəmizdə hərbi kadrların hazırlanması prosesinə start verilmişdir. Ulu Öndərin 1971-ci ildə böyük çətinliklərlə Azərbaycanda hərbi kadrlar hazırlayan məktəbin – görkəmli sərkərdə Cəmşid Naxçıvanskinin adını daşıyan hərbi liseyin yaradılmasına nail olması, gənclərimizin SSRİ-nin digər ali hərbi məktəblərinə güzəştli şərtlərlə qəbul edilməsi müstəqil ordu quruculuğunun təməl daşları idi.

90-cı illərin əvvəllərində ölkədə yaşanan xaos, vahid komandanlığın olmaması və nizami ordudan əsər-əlamətin qalmadığı bir dövrdə torpaqlarımızın işğala məruz qalması Silahlı Qüvvələrin yenidən təşkilini tələb edirdi. 1993-cü ildə xalqın çağırışı ilə hakimiyyətə qayıdan Heydər Əliyev başıpozuq silahlı dəstələri ləğv edərək vahid mərkəzdən idarə olunan nizami ordunun əsasını qoydu. 1994-cü il mayın 12-də imzalanan atəşkəs müqaviləsindən sonra isə ordunun maddi-texniki təminatının yaxşılaşdırılması və şəxsi heyətin döyüş ruhunun yüksəldilməsi prosesi yeni mərhələyə qədəm qoydu.

Ümummilli Liderin ordu quruculuğu siyasətini uğurla davam və inkişaf etdirən Prezident, Silahlı Qüvvələrin Ali Baş Komandanı İlham Əliyevin diqqət və qayğısı sayəsində Azərbaycan Silahlı Qüvvələri qısa müddətdə regionun ən qüdrətli ordusuna çevrildi. Hərbçilərin peşəkarlığının artırılması, ən müasir silah və texnika (müasir PUA-lar, raket sistemləri, zirehli texnikalar) ilə təchizat daim ön planda saxlanıldı. Həmçinin 29 dekabr 2017-ci il tarixində qəbul edilmiş “Azərbaycan Respublikasının Silahlı Qüvvələri haqqında” Qanun ordumuzun hüquqi bazasını tamamilə müasirləşdirdi.

Müzəffər Ali Baş Komandan İlham Əliyevin rəhbərliyi altında rəşadətli ordumuz uzun illər davam edən danışıqların nəticə vermədiyi bir şəraitdə tarixi ədaləti və beynəlxalq hüququ döyüş meydanında təmin etdi. 44 günlük Vətən müharibəsində və uğurlu antiterror əməliyyatlarında qazanılan şanlı Zəfər Azərbaycan Silahlı Qüvvələrinin yüksək döyüş qabiliyyətinin, sarsılmaz vətənpərvərlik ruhunun və xalq-ordu birliyinin ən bariz sübutudur. Bu gün ordumuz müstəqil dövlətimizin ən böyük dayağı, sərhədlərimizin toxunulmazlığının və xalqımızın dinc gələcəyinin ən etibarlı qarantıdır.

Masallı rayon Lürən ərazi partiya təşkilatı sədr müavini Süleyman Musalı