Millət Vəkili Məşhur Məmmədov:

Milli Məclisin deputatı Məşhur Məmmədov bildirib ki, Prezident İlham Əliyevin Avropa Komissiyasının Prezidenti Ursula fon der Lyayen ilə Bakıda keçirdiyi görüş və səsləndirdiyi bəyanatlar Azərbaycan–Avropa İttifaqı münasibətlərinin keyfiyyətcə yeni mərhələyə qədəm qoyduğunu göstərir.

Deputatın sözlərinə görə, son dövrdə Avropa İttifaqı rəhbərliyinin Azərbaycana ardıcıl səfərləri ölkəmizin Cənubi Qafqazda etibarlı tərəfdaş və əsas geosiyasi aktor kimi qəbul edildiyini təsdiqləyir. O qeyd edib ki, Azərbaycan hazırda Avropanın enerji təhlükəsizliyi, nəqliyyat-logistika və yaşıl enerji sahələrində mühüm tərəfdaşlarından biridir.

Məşhur Məmmədov vurğulayıb ki, Azərbaycanın Avropa İttifaqı ilə ticarət əlaqələrinin genişlənməsi, qaz ixracının artması, Cənub Qaz Dəhlizinin uğurla fəaliyyət göstərməsi və bərpaolunan enerji layihələrinin həyata keçirilməsi ölkənin beynəlxalq mövqeyini daha da möhkəmləndirir.

Deputat həmçinin bildirib ki, Azərbaycan regionda sülhün və sabitliyin təmin olunması istiqamətində ardıcıl siyasət həyata keçirir. Onun sözlərinə görə, Avropa İttifaqının bu prosesə dəstəyi Cənubi Qafqazda uzunmüddətli əməkdaşlıq və inkişaf üçün əlavə imkanlar yaradır.

Məşhur Məmmədov qeyd edib ki, Prezident İlham Əliyevin bəyanatı Azərbaycanın müstəqil xarici siyasət kursunun uğurla davam etdirildiyini və ölkəmizin beynəlxalq münasibətlər sistemində artan rolunu bir daha nümayiş etdirir.