Masallı rayonunda heyvan sağlamlığının qorunması, epizootik sabitliyin təmin edilməsi, baytarlıq xidmətlərinin təşkili sahəsində görülmüş işlər və qarşıda duran vəzifələrə həsr olunmuş tədbir keçirilib.

Tədbirdə Masallı Rayon İcra Hakimiyyətinin başçısı Araz Əhmədov çıxış edərək Azərbaycan Respublikasının Prezidenti İlham Əliyevin rəhbərliyi ilə kənd təsərrüfatının inkişafına göstərilən dövlət dəstəyi, fermerlər üçün yaradılan imkanlar, tətbiq olunan güzəştlər və subsidiyalar barədə ətraflı məlumat verib. O, heyvandarlığın kənd təsərrüfatının əsas istiqamətlərindən biri olduğunu vurğulayaraq heyvan sağlamlığının qorunmasının, profilaktik tədbirlərin vaxtında həyata keçirilməsinin və epizootik sabitliyin təmin edilməsinin əhəmiyyətini diqqətə çatdırıb.

Kənd Təsərrüfatı Nazirliyi yanında Aqrar Xidmətlər Agentliyinin (AXA) sədri Sərdar Hacıyev “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın əsas prioritet istiqamətləri barədə məlumat verib. O, fermerlər arasında maarifləndirmə işlərinin genişləndirilməsinin, profilaktik peyvəndləmənin vaxtında aparılmasının, heyvanların diaqnostik müayinələrə cəlb edilməsinin, xəstəliklərin erkən aşkarlanması və yayılmasının qarşısının alınmasının vacibliyini qeyd edib.

Tədbirdə AXA-nın sədr müavini Fuad Məmmədov heyvandarlıq sahəsində tətbiq olunan yeni subsidiya qaydaları barədə təqdimatla çıxış edib. Heyvan Sağlamlığı və Baytarlıq Xidmətləri Mərkəzinin rəis müavini Azər Məmmədov isə cari ilin ilk doqquz ayı ərzində heyvan sağlamlığının qorunması istiqamətində görülmüş işlər və qarşıda duran vəzifələr haqqında məlumat verib.

Masallı, Cəlilabad, Lənkəran, Astara, Cəbrayıl, Lerik, Biləsuvar, Neftçala və Salyan rayonlarının Heyvan Sağlamlığı və Baytarlıq Xidməti idarələrinin rəhbərləri, eləcə də özəl baytar həkimləri çıxış edərək ərazilərdə mövcud epizootik vəziyyət, həyata keçirilən tədbirlər və qarşılaşdıqları problemlər barədə danışıblar.

Müzakirələr zamanı fermerlərlə əməkdaşlığın gücləndirilməsi, baytarlıq xidmətlərinin keyfiyyətinin yüksəldilməsi və mövcud problemlərin operativ həlli məsələləri ətrafında fikir mübadiləsi aparılıb. İştirakçıların təklifləri dinlənilib, aşkar edilmiş çatışmazlıqların qısa müddətdə aradan qaldırılması ilə bağlı müvafiq tapşırıq və tövsiyələr verilib.

Tədbir çərçivəsində səyyar baytarlıq xidmətlərinin göstərilməsi üçün müasir texniki avadanlıqlarla təchiz edilmiş nəqliyyat vasitəsinin təqdimatı da keçirilib.

Sonda iştirakçılar fermer təsərrüfatlarına və süd emalı müəssisəsinə baş çəkərək burada görülən işlərlə, istehsal prosesi və təsərrüfatların fəaliyyəti ilə tanış olublar.