Mayın 23-də Masallı Olimpiya İdman Kompleksində Lənkəran-Astara Regional Gənclər və İdman İdarəsi, Lənkəran-Astara Regional Təhsil İdarəsi və Azərbaycan Güləş Federasiyasının birgə təşkilatçılığı ilə 23 May – Beynəlxalq Güləş Gününə həsr olunmuş sərbəst güləş üzrə Masallı rayon açıq turnirinin açılış mərasimi keçirilib.

Tədbir iştirakçıları əvvəlcə Vətən uğrunda canından keçmiş şəhidlərin əziz xatirəsini bir dəqiqəlik sükutla yad edib, daha sonra Azərbaycan Respublikasının Dövlət Himni səsləndirilib.

Açılış mərasimində Masallı rayonu üzrə Gənclər və İdman sektorunun müdiri Sabiq Cahangirov, Masallı Uşaq-Gənclər İdman-Şahmat Məktəbinin direktoru Əlifağa Yaqubov, Azərbaycan Güləş Federasiyasının nümayəndəsi İlham Məmmədov və Masallı Rayon Polis Şöbəsinin rəis müavini İxtiyar Talıbov çıxış edərək turnirin əhəmiyyətindən, gənclərin idmana marağının artırılmasından, sağlam həyat tərzinin təbliğindən və sərbəst güləşin inkişafına verilən töhfələrdən bəhs ediblər.

Tədbir çərçivəsində yarışın təşkili və keçirilməsində göstərdikləri dəstəyə görə bir sıra şəxslər Lənkəran-Astara Regional Gənclər və İdman İdarəsinin təşəkkürnamələri ilə təltif olunublar.

Qeyd edək ki, turnirdə müxtəlif şəhər və rayonlardan 180-ə yaxın idmançı iştirak edir. Gənc güləşçilər müxtəlif çəki dərəcələrində mübarizə apararaq qalibləri müəyyənləşdirəcəklər. Turnirin keçirilməsində əsas məqsəd sərbəst güləş idman növünün inkişafına dəstək vermək, gənclərin idmana marağını artırmaq və perspektivli idmançıların üzə çıxarılmasına şərait yaratmaqdır.