Masallıda 27 Sentyabr – Anım Günü münasibətilə şəhidlərin əziz xatirəsi yad edilib
27 Sentyabr – Anım Günü münasibətilə Masallı rayon Təhsil Sektorunun müdiri Elman Rzayev, sektorun əməkdaşları, şəhid ailələri, ETİHİ Masallı Rayon Komitəsinin əməkdaşları və üzvləri, eləcə də rayon ictimaiyyətinin nümayəndələrinin iştirakı ilə şəhidlərin əziz xatirəsi yad edilib.
Ziyarət iştirakçıları Masallı şəhərində yerləşən “Qəhrəmanlar parkı”nda şəhidlərin xatirəsinə ucaldılmış Memorial Kompleksi ziyarət edib, daha sonra Vətənimizin ərazi bütövlüyü və suverenliyi uğrunda canlarından keçmiş şəhidlərin məzarlarını ziyarət ediblər.
Ziyarət zamanı şəhidlərin məzarları üzərinə gül dəstələri qoyulub, onların əziz və unudulmaz xatirəsi dərin ehtiramla yad edilib.
Qeyd olunub ki, şəhidlərimizin Vətən qarşısında göstərdikləri misilsiz şücaət və fədakarlıq Azərbaycan xalqının yaddaşında əbədi yaşayacaq. Onların müqəddəs xatirəsi hər zaman uca tutulacaq, gələcək nəsillərə Vətən sevgisinin və milli həmrəyliyin ən ali nümunəsi kimi aşılanacaq.
