Azərbaycanın ərazi bütövlüyünün və suverenliyinin tam bərpası xalqımızın çoxəsrlik dövlətçilik tarixinin ən mühüm hadisələrindən biri kimi tarixə düşüb. 2023-cü il sentyabrın 19–20-də Azərbaycan Ordusunun həyata keçirdiyi lokal xarakterli antiterror tədbirləri nəticəsində Qarabağ iqtisadi rayonunda qanunsuz silahlı birləşmələrin fəaliyyəti dayandırıldı, Azərbaycanın dövlət suverenliyi bütün ərazisində tam bərpa edildi.

Bu tarixi hadisə Azərbaycan xalqının 30 ildən artıq davam edən işğal və məcburi köçkünlük dövrünə son qoymaqla yanaşı, Qarabağda yeni inkişaf mərhələsinin əsasını qoydu. Xankəndi, Xocalı, Xocavənd və Ağdərə şəhərlərinin Azərbaycanın nəzarətinə keçməsi ölkəmizin ərazi bütövlüyünün təmin olunmasının mühüm nəticələrindən biri oldu.

Xankəndi şəhəri Azərbaycanın Qarabağ bölgəsinin mühüm yaşayış məntəqələrindən biri olmaqla, tarixi və strateji əhəmiyyət daşıyır. Antiterror tədbirlərindən sonra burada Azərbaycan Respublikasının dövlət bayrağının ucaldılması dövlət suverenliyimizin bərpasının rəmzinə çevrildi. Bu gün Xankəndidə genişmiqyaslı quruculuq, abadlıq və bərpa işləri həyata keçirilir, şəhərin sosial-iqtisadi potensialının yenidən formalaşdırılması istiqamətində mühüm layihələr icra olunur.

Xocalı isə Azərbaycan xalqının yaddaşında xüsusi və ağrılı yeri olan şəhərlərdən biridir. 1992-ci il fevralın 25-dən 26-na keçən gecə Xocalıda törədilmiş faciə nəticəsində yüzlərlə dinc sakin qətlə yetirilib, yaralanıb və əsir götürülüb. Xocalının azad olunması Azərbaycan xalqı üçün tarixi ədalətin bərpası baxımından xüsusi əhəmiyyət daşıyır. Bu gün Xocalıda aparılan bərpa və quruculuq işləri şəhərin yenidən dirçəldilməsi və keçmiş məcburi köçkünlərin doğma yurda qayıdışının təmin edilməsi məqsədinə xidmət edir.

Xocavənd şəhərinin azadlığı da Azərbaycanın suverenliyinin bərpası prosesinin mühüm mərhələlərindən biri oldu. Xocavənd və ətraf yaşayış məntəqələrinin bərpası, infrastrukturun yenilənməsi və əhalinin təhlükəsiz şəkildə doğma torpaqlarına qayıtması üçün dövlət tərəfindən genişmiqyaslı tədbirlər həyata keçirilir.

Ağdərə şəhərinin azad olunması isə Qarabağda Azərbaycanın dövlət nəzarətinin tam bərpasını möhkəmləndirən mühüm tarixi hadisələrdən biri kimi qiymətləndirilir. İşğal dövründə dağıdılmış yaşayış məntəqələrinin, yolların, kommunal və sosial infrastrukturun yenidən qurulması istiqamətində həyata keçirilən layihələr Ağdərənin gələcək inkişafı üçün yeni imkanlar yaradır.

Azərbaycanın Zəfər tarixinin əsas xüsusiyyətlərindən biri ondan ibarətdir ki, əldə olunan hərbi-siyasi nəticələr yalnız ərazilərin azad edilməsi ilə məhdudlaşmayıb. Qarabağ və Şərqi Zəngəzurda genişmiqyaslı bərpa və quruculuq prosesi başlanıb. Yeni yollar, tunellər, elektrik və qaz xətləri, məktəblər, xəstəxanalar, yaşayış kompleksləri və digər sosial obyektlər inşa edilir.

İşğaldan azad edilmiş ərazilərə keçmiş məcburi köçkünlərin mərhələli qayıdışı Azərbaycanın qarşısında duran əsas humanitar və sosial məsələlərdən biridir. Böyük Qayıdış proqramı çərçivəsində insanların təhlükəsiz, layiqli və müasir şəraitdə doğma torpaqlarına qayıtması təmin edilir. Bu proses yalnız yaşayış məntəqələrinin fiziki olaraq yenidən qurulmasını deyil, həmin ərazilərdə davamlı həyatın və iqtisadi fəallığın bərpasını da nəzərdə tutur.

Xankəndi, Xocalı, Xocavənd və Ağdərə şəhərlərinin azadlığı Azərbaycan dövlətinin uzun illər ərzində həyata keçirdiyi məqsədyönlü siyasətin və Ordumuzun hərbi qüdrətinin nəticəsi kimi tariximizdə mühüm yer tutur. 2020-ci il Vətən müharibəsi Azərbaycanın ərazi bütövlüyünün bərpası istiqamətində həlledici mərhələ olduğu kimi, 2023-cü ilin antiterror tədbirləri də dövlət suverenliyimizin tam təmin olunması ilə nəticələndi.

Bu şəhərlərin Zəfər Günü Azərbaycanın dövlətçilik tarixində yalnız hərbi uğurun deyil, həm də milli iradənin, ərazi bütövlüyünün, suverenliyin və tarixi torpaqlara qayıdışın simvoludur.

Bu gün Qarabağda aparılan quruculuq işləri Zəfərin real nəticələrini nümayiş etdirir. İşğaldan azad edilmiş ərazilər tədricən müasir, təhlükəsiz və dayanıqlı yaşayış məkanlarına çevrilir. Azərbaycan xalqının qarşısında duran əsas vəzifələrdən biri əldə edilmiş tarixi Zəfəri qorumaq, azad edilmiş əraziləri daha da inkişaf etdirmək və gələcək nəsillərə firavan şəkildə ötürməkdir.

Xankəndi, Xocalı, Xocavənd və Ağdərənin azadlığı Azərbaycanın ərazi bütövlüyünün və dövlət suverenliyinin bərpasının parlaq ifadəsidir. Bu tarixi günlər xalqımızın yaddaşında daim yaşayacaq, şəhidlərimizin əziz xatirəsi isə hər zaman ehtiramla yad ediləcək.

Qarabağda dalğalanan üçrəngli Azərbaycan bayrağı xalqımızın Zəfərinin, dövlətimizin gücünün və suverenliyimizin əbədi rəmzidir.

YAP Masallı rayon təşkilatının məsləhətçisi,

Eldar Kazımov