02 iyul 2026-cı il tarixdə Masallı rayonunda Azərbaycan Polisinin yaranmasının 108-ci ildönümü və 2 İyul – Azərbaycan Polisi Günü münasibətilə tədbir keçirilib.

Əvvəlcə Masallı rayon İcra Hakimiyyətinin başçısı Araz Əhmədov, Masallı Rayon Polis Şöbəsinin rəisi Azay Ağayev, Yeni Azərbaycan Partiyası Masallı rayon təşkilatının sədri Seyfəddin Əliyev, hüquq-mühafizə orqanlarının rəhbərləri, polis əməkdaşları və daxili işlər orqanlarının veteranları Ümummilli Lider Heydər Əliyevin abidəsini ziyarət edərək önünə gül dəstələri düzüb, Ulu Öndərin əziz xatirəsini dərin ehtiramla yad ediblər.

Tədbirdə çıxış edən Masallı Rayon İcra Hakimiyyətinin başçısı Araz Əhmədov Azərbaycan Polisinin ötən 108 il ərzində şərəfli inkişaf yolu keçdiyini, ölkədə ictimai-siyasi sabitliyin, qanunçuluğun və ictimai asayişin etibarlı qorunmasında mühüm xidmətlər göstərdiyini bildirib. Rayon rəhbəri qeyd edib ki, Ümummilli Lider Heydər Əliyev tərəfindən müəyyən edilmiş dövlətçilik və hüquq-mühafizə siyasəti bu gün Azərbaycan Respublikasının Prezidenti cənab İlham Əliyev tərəfindən uğurla davam etdirilir. Daxili işlər orqanlarının maddi-texniki bazasının daha da möhkəmləndirilməsi, əməkdaşların sosial rifahının yaxşılaşdırılması, peşəkarlığının artırılması və müasir çağırışlara uyğun fəaliyyət göstərməsi istiqamətində ardıcıl və məqsədyönlü islahatlar həyata keçirilir.

Masallı Rayon Polis Şöbəsinin rəisi Azay Ağayev çıxış edərək daxili işlər orqanlarının dövlətçiliyin möhkəmləndirilməsi, ictimai təhlükəsizliyin təmin olunması, cinayətkarlığa qarşı mübarizə, hüquq qaydasının qorunması və vətəndaşların hüquq və azadlıqlarının etibarlı müdafiəsi istiqamətində həyata keçirdiyi fəaliyyətdən danışıb. O, polis əməkdaşlarına göstərilən yüksək diqqət və qayğının onların xidməti fəaliyyətinə əlavə stimul verdiyini vurğulayıb və bu etimada layiqincə xidmət etməyə davam edəcəklərini bildirib.

Tədbirdə çıxış edən digər natiqlər Azərbaycan Polisinin cəmiyyət qarşısındakı əvəzsiz xidmətlərini yüksək qiymətləndirərək şəxsi heyəti peşə bayramı münasibətilə təbrik edib, onlara məsul və şərəfli xidmətlərində yeni uğurlar arzulayıblar. Qeyd olunub ki, daxili işlər orqanları bundan sonra da dövlətçiliyin möhkəmləndirilməsi, ictimai asayişin etibarlı qorunması, qanunun aliliyinin təmin olunması və vətəndaş məmnunluğunun artırılması istiqamətində fəaliyyətini uğurla davam etdirəcək.

Tədbirin sonunda xidmətdə fərqlənən bir qrup polis əməkdaşına Masallı Rayon İcra Hakimiyyətinin başçısı Araz Əhmədov tərəfindən fəxri fərmanlar təqdim olunub.

Təltif olunan polis əməkdaşları göstərilən yüksək etimada görə minnətdarlıqlarını ifadə edərək, bundan sonra da Azərbaycan dövlətinə, xalqına və qanunçuluğun keşiyində dayanmaq missiyasına sədaqətlə xidmət edəcəklərini, Azərbaycan polisi adını daim uca tutacaqlarını bildiriblər.