Masallıda ahıl sakinlərə diqqət və qayğı davam edir
Masallı Rayon İcra Hakimiyyətinin başçısı Araz Əhmədov rayonun Bala Kolatan kəndində yaşayan, 100 yaşını tamamlamış Əvəz Nağı oğlu Səmədovu yaşadığı ünvanda ziyarət edib.
Səmimi şəraitdə keçən görüş zamanı rayon rəhbəri uzunömürlü sakinin səhhəti, yaşayış vəziyyəti və gündəlik qayğıları ilə maraqlanıb.
Araz Əhmədov bildirib ki, yaşlı nəslin nümayəndələrinə dövlət tərəfindən göstərilən sosial qayğı və dəstək daim mühüm əhəmiyyət daşıyan məsələlərdən biridir. Eyni zamanda rayon rəhbəri ahıl vətəndaşların rifah halının yaxşılaşdırılması, sosial müdafiəsinin gücləndirilməsi istiqamətində ardıcıl tədbirlərin həyata keçirildiyini qeyd edib.
Əvəz Səmədov isə ona göstərilən diqqət və qayğıya görə minnətdarlığını ifadə edərək, bu cür ziyarətlərin mənəvi baxımdan böyük əhəmiyyət daşıdığını bildirib.
Qeyd olunub ki, Masallı rayonunda ahıl sakinlərin sosial müdafiəsinin təmin olunması, onların həyat şəraitinin yaxşılaşdırılması və daim diqqətdə saxlanılması istiqamətində mütəmadi işlər görülür.
