Masallı rayonunun Molalan kəndində avtomobil yoluna asfalt örtüyünün döşənməsi işlərinə start verilib.

Masallı rayonunda əhalinin rahatlığının təmin edilməsi, yol infrastrukturunun müasirləşdirilməsi və yaşayış məntəqələrinin abadlaşdırılması istiqamətində həyata keçirilən tədbirlər ardıcıl şəkildə davam etdirilir.

Bu istiqamətdə görülən işlər çərçivəsində rayonun Molalan kəndində avtomobil yoluna asfalt örtüyü döşənərək istifadəyə veriləcək. Həyata keçirilən layihə kənd sakinlərinin uzun illərdir gözlədiyi mühüm məsələlərdən birinin həllinə imkan yaradıb.

Yeni asfalt yol nəqliyyatın təhlükəsiz və fasiləsiz hərəkətini təmin etməklə yanaşı, kənd əhalisinin gündəlik gediş-gəlişini xeyli asanlaşdıracaq, kəndin sosial-iqtisadi inkişafında və ümumi abadlıq səviyyəsinin yüksəlməsində əhəmiyyətli rol oynayacaqdır.

Molalan kənd sakinləri görülən işləri böyük sevinc və məmnunluq hissi ilə qarşılayıblar.

Sakinlər qeyd ediblər ki, Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən məqsədyönlü dövlət siyasəti nəticəsində respublikanın bütün bölgələrində olduğu kimi, Masallı rayonunda da genişmiqyaslı abadlıq və quruculuq işləri həyata keçirilir, əhalinin rifahının yaxşılaşdırılması istiqamətində mühüm layihələr icra olunur.

Kənd sakinləri, eyni zamanda, Masallı rayon İcra Hakimiyyətinin başçısı cənab Araz Əhmədovun rayonun yaşayış məntəqələrinin inkişafına, yol infrastrukturunun yenilənməsinə, vətəndaş müraciətlərinə həssas yanaşmasına və aparılan abadlıq-quruculuq işlərinə göstərdiyi xüsusi diqqət və nəzarəti minnətdarlıqla vurğulayıblar.

Molalan kəndinin sakinləri göstərilən yüksək diqqət və qayğıya görə Azərbaycan Respublikasının Prezidenti cənab İlham Əliyevə və Masallı rayon İcra Hakimiyyətinin başçısı cənab Araz Əhmədova səmimi təşəkkürlərini bildiriblər.