Lənkəran-Astara Regional Təhsil İdarəsində Milli Qiymətləndirmə ilə bağlı hazırlıq görüşü keçirilib
Ümumi təhsil müəssisələrinin IV və VI siniflərində keçiriləcək monitorinqlə (Milli Qiymətləndirmə) bağlı görüş təşkil olunub.
Görüşdə Lənkəran-Astara Regional Təhsil İdarəsinin müdiri Bəhruz Mehdiyev, Tədrisin keyfiyyəti sektorunun müdiri Namiq Aslanov, rayonlar (şəhər) üzrə təhsil sektorlarının müdir və əməkdaşları, eləcə də monitorinq mərkəzlərinin rəhbərləri iştirak ediblər.
Görüş zamanı monitorinqin keçirilməsi qaydaları, təşkilati məsələlər, qiymətləndirmə mərkəzlərində görüləcək hazırlıq işləri, məsul şəxslərin vəzifələri, eləcə də prosesin şəffaf və obyektiv şəkildə həyata keçirilməsi ilə bağlı məsələlər müzakirə olunub.
Milli Qiymətləndirmənin keçirilməsinə dair əsas tələblər tədbir iştirakçılarının diqqətinə çatdırılıb, onları maraqlandıran suallar cavablandırılıb.
Qeyd edək ki, monitorinqin təşkili məqsədilə 61 mərkəz ayrılıb, IV siniflər üzrə 471, VI siniflər üzrə isə 506 nəzarətçi təyin edilib. Qiymətləndirməyə IV siniflər üzrə 10463, VI siniflər üzrə 10855 şagird kağızəsaslı, 294 şagird isə kompüter əsaslı formatda olmaqla ümumilikdə 21612 şagird cəlb olunacaq.
IV və VI siniflər üzrə MilliQiymətləndirmə 5-6 iyun tarixlərində keçiriləcək.
