Laçın şəhəri uzun illər işğal altında qalsa da, xalqımız bu qədim torpaqlara qayıdacağına olan inamını heç vaxt itirmədi. 2020-ci ildə Vətən müharibəsində əldə olunan Zəfər Azərbaycanın ərazi bütövlüyünün bərpası istiqamətində mühüm tarixi dönüş yaratdı. 2022-ci il avqustun 26-da isə Azərbaycan Ordusunun Laçın şəhərinə daxil olması ilə şəhər üzərində üçrəngli bayrağımız yenidən dalğalandı.

Laçının azad olunması yalnız hərbi-siyasi hadisə deyil, həm də milli yaddaşımızın, tarixi torpaqlarımıza bağlılığımızın təntənəsidir. İşğaldan sonra şəhərdə genişmiqyaslı bərpa və quruculuq işlərinə başlanılması dövlətimizin Qarabağ və Şərqi Zəngəzurun inkişafına xüsusi diqqət yetirdiyini göstərir. Bu gün Laçında yeni yollar, yaşayış məhəllələri, sosial obyektlər və müasir infrastruktur yaradılır.

Laçın həm də Azərbaycanın zəngin təbiəti, tarixi və mədəni irsi ilə seçilən bölgələrindən biridir. Şəhərin yenidən qurulması onun gələcəkdə ölkəmizin mühüm turizm və mədəniyyət mərkəzlərindən birinə çevrilməsinə geniş imkanlar yaradır.

26 Avqust – Laçın Şəhəri Günü bizə azadlığın, dövlət müstəqilliyinin və ərazi bütövlüyünün nə qədər böyük dəyər olduğunu xatırladır. Bu əlamətdar gün Laçının keçmişinə ehtiram, bu gününə qürur və gələcəyinə inam ifadəsidir. Laçının yenidən dirçəldilməsi Azərbaycan xalqının öz tarixi torpaqlarına qayıdışının və Böyük Qayıdış prosesinin mühüm səhifələrindən biridir.

Aybəniz Novruzova, Masallı RİHBA-nın İctimai-siyasi və humanitar məsələlər sektorunun aparıcı məsləhətçisi

Ölkə başçısı cənab İlham Əliyevin həyata keçirdiyi uğurlu siyasət nəticəsində Azərbaycan bu gün bölgənin aparıcı dövlətinə və əsas söz sahibinə çevrilib. Ölkəmiz bir çox sahələrdə etibarlı tərəfdaş kimi qəbul edilir.Hazırda Azərbaycan öz suverenliyini, təhlükəsizliyini və milli maraqlarını tam təmin etməklə yanaşı, həm də regional və qlobal miqyasda mühüm siyasi xətt yürüdür. Bütün ölkələrlə qarşılıqlı hörmət və faydalı əməkdaşlıq prinsipinə əsaslanan bu siyasi kurs xüsusilə Vətən müharibəsindən sonra Cənubi Qafqazda formalaşan yeni geosiyasi reallıqların əsas hərəkətverici qüvvəsinə çevrilib. Ölkəmizin təşəbbüsü və fəal iştirakı ilə reallaşan irimiqyaslı energetika, nəqliyyat və logistika layihələri təkcə Avrasiya məkanında təhlükəsizliyə töhfə vermir, həm də geniş coğrafiyada iqtisadi inteqrasiyanı sürətləndirir.

Azərbaycanın xarici siyasət prioritetləri sırasında Mərkəzi Asiya ölkələri, o cümlədən Özbəkistan ilə münasibətlərin inkişaf etdirilməsi xüsusi yer tutur. İki ölkə arasında möhkəm dostluq və qardaşlıq təməlləri üzərində qurulmuş müttəfiqlik münasibətləri mövcuddur. Azərbaycan və özbək xalqlarını ortaq din, dil, adət-ənənə, mədəniyyət və tarixi yaxınlıq bir-birinə sıx birləşdirir. İndiyə qədər Azərbaycan və Özbəkistan arasında əlaqələr bütün sahələr üzrə yüksələn xətt üzrə inkişaf edib və ölkələrimiz ən vacib məsələlərdə daim bir-birinə dəstək göstəriblər.

Qədim tarixə, yaxın adət-ənənələrə malik Azərbaycan-Özbəkistan arasında münasibətlərin inkişaf strategiyasının qurulmasında Ulu Öndər Heydər Əliyevin müstəsna xidmətləri olub. Ümummilli Liderin 1997-ci il iyunun 18-19-da Özbəkistana rəsmi səfəri əməkdaşlığın gələcək inkişaf perspektivlərinin müəyyənləşdirilməsində mühüm rol oynayıb. Səfər zamanı ikitərəfli münasibətlərin əsasını təşkil edən bir sıra vacib sənədlər imzalanıb.

Qeyd edilməlidir ki, Ulu Öndərin özbək liderlərlə səmimi dostluğu bu münasibətlərin təməlini qoyub, gələcək inkişaf perspektivlərini müəyyənləşdirib və bu strateji xətt Prezident İlham Əliyevin uzaqgörən siyasəti nəticəsində keyfiyyətcə yeni müstəviyə daşınıb. İki ölkə liderinin şəxsi dostluğu və qarşılıqlı etimadı dövlətlərarası əlaqələrin sürətli inkişafında həlledici rol oynayır. Dövlətimizin başçısı bu xüsusa belə diqqət çəkib: "Özbəkistan Respublikasının Prezidenti, əziz qardaşım, hörmətli Şavkat Miromonoviç Mirziyoyev ilə mənim aramda mövcud olan səmimi dostluq, qarşılıqlı hörmət və etimad Azərbaycan-Özbəkistan qardaşlığının möhkəmlənməsində, dövlətlərarası əlaqələrin hazırkı səviyyəyə qaldırılmasında və müttəfiqliyimizin inkişafında xüsusi rol oynayır".

Azərbaycan ilə Özbəkistan arasında münasibətlər son illərdə dövlətlərarası əlaqələrin ən sürətlə inkişaf edən istiqamətlərindən birinə çevrilib. Strateji tərəfdaşlıq mərhələsindən müttəfiqlik səviyyəsinə yüksələn bu əlaqələrdə Prezident İlham Əliyev ilə Prezident Şavkat Mirziyoyev arasında formalaşmış yüksək siyasi etimad, ardıcıl qarşılıqlı səfərlər və əldə olunan razılaşmalar mühüm rol oynayıb. Təsadüfi deyil ki, son 5 ildə Prezident İlham Əliyev Özbəkistana 2 dövlət səfəri və 4 işgüzar səfər edib. Prezident Şavkat Mirziyoyev isə həmin müddətdə ölkəmizə 2 dövlət səfəri və 7 işgüzar səfər həyata keçirib.

Qarşılıqlı etimad iqtisadi və ticari sahədə də əksini tapır. İkitərəfli ticarət dövriyyəsi sürətlə artır. 500 milyon dollar kapitalla yaradılan Azərbaycan-Özbəkistan İnvestisiya Şirkəti fəal layihələr həyata keçirir. Avtomobil sənayesi, energetika, "yaşıl enerji" və nəqliyyat-logistika sahələrində sıx əməkdaşlıq mövcuddur. İki ölkənin coğrafi mövqeyi Şərqlə Qərbi birləşdirən Orta dəhliz çərçivəsində yükdaşımaların həcmini artırmağa imkan verir. Prezident İlham Əliyev müsahibəsində iqtisadi əlaqələrin inkişaf tempini belə ifadə edib: "İqtisadi-ticari əməkdaşlığımız son illərdə sürətli inkişaf dinamikası nümayiş etdirir. Azərbaycanla Özbəkistan arasında ticarət dövriyyəsi 2025-ci ildə əvvəlki illə müqayisədə üç dəfədən çox artıb və 795 milyon dollar təşkil edib. Bu, əla göstəricidir. Bundan əlavə, 2026-cı ilin yanvar-may aylarında ticarət dövriyyəsi ötən ilin müvafiq dövrü ilə müqayisədə 33 faiz artaraq 144 milyon dollara çatıb".

İkitərəfli münasibətlərin vacib elementlərindən biri də hərbi-texniki sahədə əməkdaşlığın genişlənməsidir. İki ölkənin müdafiə nazirlikləri arasında imzalanan fəaliyyət planlarına uyğun olaraq keçirilən birgə taktiki təlimlər, müdafiə sənayesi sahəsində təcrübə mübadiləsi və hərbçilərin peşəkarlığının artırılmasına yönəlmiş addımlar regional təhlükəsizliyin və sabitliyin təmin olunmasında müstəsna rol oynayır.
Ölkələrimiz arasında mədəni, humanitar və təhsil sahəsindəki qardaşlıq əlaqələrinin genişlənir və bu mənada Azərbaycan Respublikasının Prezidenti İlham Əliyev və Özbəkistan Respublikasının Prezidenti Şavkat Mirziyoyev Daşkənddə türk dünyasının dahi oğlu Nizami Gəncəvi adına Milli Pedaqoji Universitetin açılışında iştirak etmələri xüsusi vurğulanmalıdır. Göründüyü kimi qədim tarixə, yaxın adət-ənənələrə əsaslanan Azərbaycan-Özbəkistan münasibətləri yeni dövrün çağırışlarına uyğun olaraq uğurla inkişaf edir

Azərbaycan Prezidenti İlham Əliyevin Özbəkistana budəfəki dövlət səfəri isə iki ölkə arasındakı müttəfiqlik münasibətlərinin daha da gücləndirilməsi və bütün sahələr üzrə əməkdaşlığın hərtərəfli genişləndirilməsi baxımından tarixi önəm kəsb edəcək.Səfər çərçivəsində tərəflər arasında müxtəlif əməkdaşlıq sahələrini əhatə edən bir sıra əhəmiyyətli sənədlərin imzalanması da həyata keçirilib.

Qeyd edək ki, Azərbaycan və Özbəkistan arasında müqavilə-hüquq bazası kifayət qədər genişdir. İndiyə qədər 220-yə yaxın sənəd imzalanıb, bir neçə sənəd layihələrinə baxılmaqdadır.

Bu gün Azərbaycan-Özbəkistan münasibətləri ortaq köklərə, qarşılıqlı hörmətə və strateji müttəfiqliyə söykənərək yüksələn xətlə inkişaf edir. Dövlətlərimiz arasında imzalanmış çoxsaylı sənədlər və iki ölkə liderinin siyasi iradəsi bu əməkdaşlığı daha sarsılmaz edir. Əminik ki, ölkələrimiz arasındakı qarşılıqlı etimada söykənərək əsrlərdən gələn bu dostluq və qardaşlıq münasibətləri bundan sonra da möhkəmlənərək həm xalqlarımızın rifahının yaxşılaşmasına, həm də bütün türk dünyasının güclənməsinə xidmət edəcək.

Seyfəddin Əliyev
YAP Masallı rayon təşkilatının sədri

Masallı rayonunun Yeyənkənd kəndində Vətən uğrunda canından keçmiş şəhid Cəmil Eyvazov İsmayıl oğlunun anım günü qeyd olunub.

Anım mərasimində Masallı RİH-nin sektor müdirləri Nahid Həsənov və Qəşəm Hadıyev, Yeyənkənd ərazi nümayəndəliyinin əməkdaşları, bələdiyyə sədri və kənd ağsaqqalları iştirak ediblər. Şəhid Cəmil Eyvazovun əziz xatirəsi dərin ehtiramla yad olunub, ruhuna dualar oxunub.

Mərasimdə çıxış edənlər şəhidin həyat və döyüş yolundan, Vətən qarşısında göstərdiyi misilsiz fədakarlıqdan söz açıblar. Bildirilib ki, Cəmil Eyvazov kimi qəhrəman oğullarımızın adı və əziz xatirəsi xalqımızın yaddaşında daim yaşayacaq.

“Azərbaycan və Özbəkistan xalqları arasında mahiyyət etibarilə yeni mərhələyə yüksələn dostluq münasibətləri iki dövlət arasındakı tarixi həmrəyliyi gücləndirməklə yanaşı, türk dünyasının birlik və həmrəyliyinə töhfədir”.

Bunu CenubMedia.az-a açıqlamasında millət vəkili Məşhur Məmmədov bildirib. Millət vəkili qeyd edib ki, 44 günlük Vətən müharibəsindən sonra Azərbaycanla türk dövlətləri, eləcə də Özbəkistan arasında ikitərəfli və çoxtərəfli münsibətlərin güclənməsi müşahidə edilir ki, bu da bütün türk dünyasının mənafeyinə uyğundur:

“Heç kimə sirr deyil ki, 44 günlük Vətən müharibəsindən sonra Azərbaycanla türk dövlətləri arasındakı münasibətlərdə yeni yüksəliş dövrü başlayıb. Azərbaycan Respublikasının Prezidenti, Müzəffər Ali Baş Komandan İlham Əliyevin ümumtürk həmrəyliyinin gücləndirilməsi siyasəti çərçivəsində baş verən bu proses, hazırda öz yüksəliş dövrünü yaşamaqdadır. Bu gün bütün türk dövlətləri kimi Azərbaycanla Özbəkistan arasında da siyasi-iqtisadi və tarixi-mədəni əlaqələr dinamik şəkildə inkişaf etməkdə, türk dünyasının inteqrasiyası prosesinə öz müsbət təsirini göstərməkdədir. Bizim üçün sevindiricidir ki, hazırda işğaldan azad olunan ərazilərimizdəki tikinti-abadlıq işlərində türk dövlətləri yaxından iştrak etməkdə, dirçəliş prosesində aktiv şəkildə yer almaqdadır. Təsadüfi deyil ki, Prezident İlham Əliyev Özbəkistanın Milli İnformasiya Agentliyinə müsahibəsində bu faktı bir daha ictimaiyyətin diqqətinə çatdırdı, işğaldan azad edilmiş ərazilərimizdə bərpa və tikinti işlərinə göstərilən dəstəyə görə Özbəkistan xalqına və Prezident Şavkat Mirziyoyevə səmimi minnətdarlığını bildirdi. Bu fakt bir daha sübut edir ki, Azərbaycanla Özbəkistan arasında iqtisadi-ticari, siyasi-diplomatik, elmi-mədəni əlaqələr yüksək səviyyədədir və sürətlə inkişaf etməkdə davam edir. Bu isə həm Azərbaycan, həm də Özbəkistanın maraqlarına cavab verməklə yanaşı, türk dünyasının həmrəyliyinə də mühüm töhfədir.

Xatırladaq ki, Prezident İlham Əliyev Türk Dövlətləri Təşkilatının əhəmiyyyətindən danışarkən bildirmişdir ki, "Türk dünyası bizim ailəmizdir, bizim başqa ailəmiz yoxdur". Bu ifadə türk dünyasındakı birlik və həmrəyliyin ümumtürk maraqlarının qlobal miqyasda eibarlı şəkildə təminində necə böyük rol oynadığını göstərir.

Əminliklə demək olar ki, Azərbaycanla Özbəkistan və digər türk dövlətləri arasındakı dostluq, əməkdaşlıq münasibətləri yaxın gələcəkdə daha da güclənəcək və bu faktor bütün türk dünyasının tərəqqi və təhlükəsizliyinin təminində ciddi rol oynayacaq”.

Masallı Rayon Statistika İdarəsi tərəfindən 2026-cı il iyulun 1-i vəziyyətinə Lənkəran-Astara iqtisadi rayonu və inzibati ərazi vahidləri üzrə pensiya təminatının göstəriciləri açıqlanıb.

Lənkəran-Astara iqtisadi rayonunda təyin olunmuş pensiyaların orta aylıq məbləği 452,81 manat təşkil edib.

İqtisadi rayonun inzibati ərazi vahidləri üzrə ən yüksək orta aylıq pensiya məbləği Lerik rayonunda qeydə alınıb. Lerik rayonunda təyin olunmuş pensiyaların orta aylıq məbləği 461,34 manat olub. Ən aşağı göstərici isə Astara rayonunda qeydə alınıb.Astara rayonunda təyin olunmuş pensiyaların orta aylıq məbləği 449,19 manat olub.

Cəlilabad rayonunda təyin olunmuş pensiyaların orta aylıq məbləği 454,93 manat, Lənkəran rayonunda 452,70 manat, Yardımlı rayonunda 451,71 manat, Masallı rayonunda isə 449,68 manat təşkil edib.

İyulun 1-i vəziyyətinə Lənkəran-Astara iqtisadi rayonunda pensiyaçıların sayı 83 351 nəfər olub.

Masallı Rayon Statistika İdarəsi